100 marhıbone d’Dacış daciri naqla hreto me Suriya l’Almanya
100 marhıbone d’Dacış dkıtwolın barmothoyutho d’Almanya, daciri naqla hreto me Suriya l’Almanya.
Lfuth i mawdconutho dhula i wazirutho di gawoyutho d’Almanya, 1060 barmothoye Almanoye nahitiwo l’Suriya u mıştawtafwolın l’Dacış. A farsufani hawilın nesyune du qrobo, udu qatlo, mawxa klozım qulnaqla dhowın bu duyoqo da pwelıs.
Lfuth i mawdconutho dhiwo me ha ma mşale di wazirutho di gawoyutho d’Almanya mırle 1060 barmotthoye du athro nahiti l’Suriya ulu Iraq laşan dmıştawtıfi cama marıhbone d’Dacş. A farsufani hawilın nesyune du qrobo du qatlo u latlın zuctho dsaymi hawbe mawxa inaqa dıducri lu athro qentone la comure.
I maqırhonuthathe simo bıthır mıd 100 marıhbone daciri l’Almanya u midi mu taraf da pwelıs laşan dmisım buqoro acmaye. A marıhbonani cal ayna darbo u mışkıl cabiri l’Almanya lımawdıc, mawdıc dkıtne marıhbone barmothoye d’Almanya dıdaciri lu athro.
İ sbuthathe da marıhbone dı Dcaş latyo sbutho balhude du athro d’Almanya elo kito ba alfowat dıbarmothoye da athrawotho d’Urifi dkıtne ba hbuşye di mdabronutho du garbyo u du madınho d’Suriya.
Mu yawmo qamoyo imdabronutho mamtela u talab dmıftıh bethdino ba arcothathe la marıhbonani u mitahti ba hbuşye dkıtne tamo, bram Urifi u britho klozım mcawno bi sbuthathe u dobo fsoso, elo hulocdo layto mede ruşmoyo bi sbuthathe.