24 tloye mıde u fağro qamoyo bu athro d’Kanada

A’nacime di marcitho d’Mor Yusıf di cito Kaldoyto d’Bobıl bu athro d’Kanada, mqadamlın inaqla qamayto lu rozo du fağro mqadşo d’Moran Yeşuc Mşiho.

 Lu zawho du tehwiyo du fağro mqadşo, mıştawtafle u kohno wa şamoşe di marcitho, a’yaqrotho da nacime dhew elaye u fağro u menyono dımhaymne.

 İ cito Kladoyto d’Mor Yusıf bi mditho dı Toronto b’Kanada, mataybla athmıl qurobo alohoyo dmıştawtaflele menyono celoyo ma n’abne di marcitho cama şamoşe wi gudo du koral di cito.

Bu qurobano dımrayşanle u kohno di marcitho qaşişo Bıtrıs Solaqa, sim u zawho ruhonoyo du tehwiyo du fağro qamoyo l’24 nacime ma n’abne di marcitho. A’nacimani meqım mdımqadmi lu rozo mqadşo, mıştawtafwolın l’dawra du tewlifo da prensibe di haymonutho Mşihoyto.

Qaşişo Bıtrıs bu mamlo dsımle bi cohnutho du yawmano, makadle dıklozım dmınfıq moro li haymonutho Mşihoyto ba n’athrawotho di golutho, u grışle u zuhoro calu dawro dıknofıl cali iqartho Mşihoyto bi tarbitho da nacimayda bu haqlo ruhonoyo.

Camgabıdathe, qaşişo Bıtrıs mqadamle a’tawdiyothayde la şamoşe ula hfite bu haqlo citonoyo dımtayablın an’24 nacimani laşan dmitahwelın u fağro qamoyo.

Bıthır mıdkamıl u qerowo alohoyo, qaşişo Bıtrıs Solaqa mfaraqle duşne la nacime.