3 mu cameydan nqili ma haye mi corona bu athro d’Hollanda

I marcitho di cito Suryoyto d’Hollanda frısla egartho da tadbire hathe dıklozım dmimodi mqabıl du kewo di Corona, bıthır mıd mşarele dzoyıd bu athro.

 Me gabo hreno ba yawmothani aharoye, 3 farsufe mu cameydan mvayaclın a hayathe mu kewo di Corona bi hiğmonutho d’Twente bi sagiyutho du cameydan kıhoye ba mdinotho di hiğmonuthathe.

 Bi egartho dıktucno i kirath ido du efetrufo fatıryarxoyo d’Hollanda Mor Poliqarpus Awgin Aydin kmawdıco a tedbire dıklozım dmimodi mqabıl du virus di Corona, dımşarele dzoyıd bu athro. Bi egarthathe kmirozi a qonune wa tedbire dıklozım dmoyıd u camo li dıqa u dmanhatlın la haye.

Me gabo hreno ba yawmotho d’şaficina, u kewano di Corona mşarele dzoyıd beyn du cameydan dıkhoye bi hiğmonutho d’Twente dıkhbuşo amdinotho d’Hengelo Raysen Enschede u ğer. Mcal fothe dzayıd u virus, hol ucdo 3 neşe mu cameydan nqili ma haye mi Corona.

Bi mditho d’Raysen maqadışoyto Şmuni Kahraman dkıtyo i barthzawgo du maqıdşoyo Galle Kahraman bıthır mıd tafila u kewano nqilo ma hayani a zabnoye.

I mnohto mawlıdowa bi qritho d’Bote me abohe Malke u Warde Kurt be Mirza bi şato dan 1939 u mzawğowa camu maqıdşoyo Galle ban 1955.

Ba yawmotho d’şaficina u tboco froso wu mşalo di mditho d’Raysen mqadamwole tahınyotho lu zawgano, dhawiwolın 65 eşne mzawğe camhıdode. Bebzabno maqıdşoyto Rihane Çoga Çağri nqilo ma hayani mu kewo di Corona bi mditho d’Raysen bcımro da 82 eşne. İmnohto dkıtwa i bartho d’Qaşişo Yahkub u Macida mi qritho d’Kafro, mşawtafwela a hayeyda cam maqıdşoyo Dawud Çoga.

A 2 maqıdşoyotho gıdmicafın bi dayro d’Mor Afrem d’Hollanda yawme dı tlotho 6 bu yarhano. Bi mditho d’Hengeloste meqım kımo yawme nqilowa ma hayani a zabnoye Bahiye Hanna. Bıthır mu kewano d’zayıd kito farsufe mu cameydan dkıtne ba bethkriheste mu virusano.