20/03/2021

38 senatore mıdelın i egartho dıkmawdiyo bu qtolğenso da 1915

U Senator Demoqratoyo Robert Menendez, mabdewole meqım zabno kampanya da imdat bu senato d’Amerika, leşan dmıtlıb mu rişono Joe Biden dmawde bu qtolğenso dan Armınoye.

Li egarthathe dımtayable Menendez leşan i mawdyonutho du qtolğenso dan Armınoye, mıdyo ucdo me 38 senatore-demoqratoye u qutnuthoye

U Senator Demoqratoyo di marcitho d’New Jersey Robert-Bob Menendez, dkıtyo u mşalo di Sictho da esore baroye du Senato, mabdewole meqım yarho kampanya da imdat bu senato leşan dmişadır egartho mşawtafto lu rişono Amerikoyo Joe Biden, dımhalıx ba dawsat di kongre leşan dmawde ruşmoyith bu qtolğenso dsımwola i mamlaxtho da Cuthmanoye calan Armınoye.

Bi egarthathe kmıtlıb’ste dıklozım u qtolğenso dan 1915 dsim calan Armınoye, dmitathkır 24 bu yarho d’Nison dıbqamuthayna udu yawmano dmitathkır kull şato. Menendez mırle; Bu zabno d’dacbar, mawdewolox bu qtolğenso dan Armınoye u hatta bi kampanya da 2020’ste bu zabno du duxrono şatonoyo-mathkarwolox u qtolğensano.

U senator mırle’ste; Calathe kıtulbina menox-bşıkıl qriho u ftiho dmawdıyo i mdabronuthaydox bu qtolğensano. Klozım dtawrito u şetqo dcali şrorutho du qtolğenso dsim calan Armınoye. Man 1915 uholan 1923, i mamlaxtho Cuthmanoyto bşıkıl sistematik mnasela dquşo u camo Armınoyo u qtiwola hol 1.5 falge u jbırwola ba mo alfayo dhrene li golutho.

Ucdoste 37 senatore snıdlın i qroytathe d’Menendez leşan i mawdyonutho du qtolğenso dan 1915 u beyn da senatorani kito; u mraşho qutnuthoyo catiqo la guboye di rişonutho Mitt Romney, u senator Ted Cruz, Susan Collins, Tammy Baldwin uğer. U rişono du Komisyon Athronoyo dan Armınoye b’Amerika-Aram Hamparian wu Mawtbo da Hellen b’Amerika, mhanelın u inisyativano d’Menendez ulu snodo dıkmahwın a senatore hrene li qroytathe dcalu qtolğenso.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…