40 % mu cameydan dacır l’Bağdede

U komisyon celoyo da zedqe noşoye du Iraq, mawdacle d’40% mu camaydan dacır li qastra d’Bağdede di daşto d’Ninwe.

M’gabo hreno, farsufo mu camaydan dıkhoyewo bi fnitho d’Şigur mawdacle da 50 yaqrotho dıkcayşiwo meqım b’Şigur, mgalwelın lu qlimo d’Kurdistan bıthır mi şato da 2014.

Taşdarto mu komisyon celoyo da zedqe noşoye du Iraq, bi socurutho dsımla lu diwan da waqfat Mşihoye uda tawdiyotho hrene bi hiğmonutho d’Ninwe, mawdacla d’40% mu camaydan daciri la botaththe bi qastra d’Bağdede ula mdinotho u qıryawotho dkıtne masre acma xıd Barıtle, Karamles u Bacşiqa.

U mşalo di dayira da sebwotho Mşihoye d’Bağdede Sacid Yuhana bi ytawto dhawile cami taşdarto du komisyon de zedqe noşoye, mawdacle dkito şuhoro bu tehwiyo da tezminat la nabne du camaydan dıdaciri li daşto d’Ninwe mqabıl du husrono dıhzelın ba hçome marıhbone dı Dacış.

M’gabo hreno, farsufe mu camaydan dımgalwele mi fnitho d’Şigur lu qlimo d’Kurdistan bıthır ma 2014, hule li dafo d’Yezidi 24 maqırhonutho cali aykanoyutho du camaydan dıkhoyewo b’Şigur, u mşarele i maqırhonuthayde bu mamlo “Tora d’Şıngal athran Zora yo”. Jıbrael Şamcun bi maqırhonuthayde mırle “bi mditho d’Şigur kıtlan athare ğalabe d’citotho u bethıqbure. Mu doro da na’14 cayşinawo bı mşaynutho cama came hrene di fnitho, kmacşinawo i haymonuthaydan, ukmıfsohinawo ba cedaydan. Ubıthır ma hçome d’Ob i şato da 2014 maftelan fothayna lu qlimo d’Kurdistan laşan dkurxina cali mşaynutho. Meqım ma hçome dı Dacış cali mditho d’Şigur, kıtwo bi mditho zıd m’50 yaqrotho Suryoye Ortodoksoye u Armınoye, ubu zabno du hçomo dsim, hın menaye nafliwo yasire bidothıd du tukoso marıhbono, wa hrene mahzamwolın”.

Bebzabno, Şamcun mawdacle du tukoso dı Dacış çbırwole a’yaqrotho du camaydan dımıdiwole xıd yasire dımşahılfi i tawdithaththe li Maşılmonutho, wi ctidutho dhın menaye latyo idıcto hul ucdo, balhude mqafyo şlado dha farsufo bi cito da n’Armınoye.