45 qıryawotho b’Tel Tamır dılo kahrıbone mfothıd da hçome d’Turkiya

U hçomo barbroyo dı Turkiya hule husrono rabo la xtute du kahrobo da qıryawotho dı Tel Tamır udi qastra d’Zarkan bu garbay madınho d’Suriya.

Lfuth u qentrun du kahrobo dı Tel Tamır di mdabronutho yothoyto, kito 45 qıryawotho dhani zabno d’yarho dıqtic maclaye u kahrobo, mfothıd da hçome dı Turkiya.

U rişono zawgoyo du qentrun du kahrobo dı Tel Tamır di mdabronutho yothoyto Fahıd Samcila, bi maqırhonutho dhule li dafo d’North Press, mawdacle da casrowat d’qıryawotho dıknıfli calu xtuto d’Zarkan Abu Rasen bu garbiyo di mditho di Hasake, hani zabno d’yarho dlo kahrobo ne mfothıd da hçome du gayso kaboşo dı Turkiya.

Samcila mathkarle da qıryawotho dıknıfli bayn di qastra dı Tel Tamır ud’Zarkan, ba hçome dsımwola 29 bu yarho dı Tamız dşaficina, maklela i mşablonutho du xtuto du kahrobo dkobe 20 kilo Volt la qıryawotho, u mırle “u menyono da qıryawotho dkito bu xtutano 45 yo, u acmaye ste i qastra d’Zarkan latlın kahrobo. A’falohe bu haqlo du kahrobo ste laybın dsaymi u hethotho du xtuto cal da hçome Turkoye kımdawmi heş cali fnitho”.

Camgabıdathe, Samcila mawdacle du xtuto du kahrobo d’Zarkan ba tlotho şabe haroyani hawiwo nişo l’hçomo qaşyo, elo latlın mawdconutho cali kmoyutho du husrono dhawi, cal da grube du tacmire du hethotho da xtute laybın dmotın la fenyothani hul ucdo.

Samcial mathkarle ste dkıtne sniqoye li sdirutho cama haylawotho Rusoye, bnişo dcıbri cama grube du tacmir la qıryawotho d’Zarkan, udımhaththıthi a’xtute du kahrobo dıhzelın husrono.