57 pwelıs b’Newyork tırelın mi wolithathe xıd protesto

A tagliyotho dıkmitaybi ba casrowat d’mdinotho frişe d’Amerika, kımdawmi mqabıl du cnufyo dıkmıstacmıl u polis calu camo.

 Bıthır mıd 2 pwelıs midi mi wolithathe, fsıqlın 57 pwelıs hrene d’New York dtorın mi wolithathe xıd protesto.

Bıthır mıd fris video bu nawlo dıkmahwe ba tagliyotho dsimiwo meqım 2 yawme, aydarbo u polis bı haylo rabo kıtofık ha sobo d’75 eşne, dıkmohe rişe bi arco, mid u polisanoi d’New York d’Amerika mi wolithayde. Lfuth u polisano, u sobo qum ruhe nafılwo.

Calu gedşano, mid u polisano u polis hreno mi wolithathe. Calatheste ucdo fsıqlın 57 powelıs hrene d’Buffalo d’New York dtorın mi wolithathe xıd protesto mqabıl du qedomo dhawi la 2 hawronathe dmidi mi wolitho. Cali sbuthatheste, mabde ucdo buhone.

A tagliyothani b’Amerika mşarewolın meqım 10 yawme, bıthır mıd u polis qtiwole George Floyd u krıhwo u qedomo, u cnufyo wi tuxmonoyutho dıkmahwın a pwelıs mqabıl da kome uda nuxroye. A tagliyothani, bıthır mbarbıziwo lı casrowat d’mdinotho frişe du athro u mahıtwo mnoco du nfoqo calu camo bıthır ma 8 d’casriye. A tagliyothaniste kmifaşqi, a tagliyotho rabe dhawın bu athro mi şato dan 1992.

A tagliyothani mşarelın 5 yarhe meqım ma guboye di rişonutho d’Amerika, kıtorın otho d’şwolo, aydarbo gıdmathri cali siyase da guboyani, dfayşiste tahte du telolo du virus d’Corona udi batilutho rabtho da şuğlone dkito bu athro. Hol 100 alfo Amerikoye mvayaclın a hayathe mi Corona u kito hol 40 milyone dıbnaynoşo dlo şuğlone, awkith i aykanoyuthathe d’Amerika, hawyo buhrono rabo lu rişono Donald Trump.