70 ba mo du camaydan mgalwele mu athreyde u Iraq

U şutoso du waqıf da Mşihoye du Iraq, mawdacle d’70 ba mo du camaydan mgalwele mu athro.

U istatistikano du waqıf khobış bıgawe i golutho du camaydan bu zabno da 100 eşne dşaficina.

U mdabrono da esore udu tbocofroso du waqıf Mşihoyo du Iraq qaşişo Marten Hırmız, maglele d’70 ba mo du camaydan u Kaldoyo Suryoyo Othuroyo trele u athro mcal fothe da rdufye uda qtolcame dsimi acle mi şato dan 1920 uhul adyawma. Qaşişo Marten bi maqırhonutho dhule mırle; Layto hulucdo statistik ruşmoyo calu menyono da Mşihoye dımgalwelın mu Iraq, elo lfuth a hşowaydan, hedor 70 ba mo du camaydan trele mu athro wu mgalwele l’ğer athrawotho.

Qaşişo Marten mawdacle’ste di kmoyuthathe lo belhude dan ışnani’yo, elo kito bıgawa’ste i golutho dımşarewola meqım 100 eşne u dıkmdawmi hulucdo.Cala celotho di golutho, u qaşişo mawdacle mcal fothe du hboso uda rdufye-u camaydan kımgalwın mu athro dan abohotho.

U camaydan lo belhude bıthır ma 2003 bu nfolo du rejim d’Saddam Husayn, mşarewole dımgalwın mu Iraq, elo i goluthayde mşarewola heş mu zabno di şkihutho Britanoyto bu Iraq ban 1920, hulu şetoso di şultonutho Iraqoyto qamayto bi rişonutho d’Raşid Cali Gelani ban 1931 wu mdawamwola bıthır camu qtolcamo d’Simele ban 1933 wu qtolcamo d’Soriya ban 1968 wa qtolcame da 80’yat dşaficina bu zabno d’Saddad Husayn.

Awkith u camaydan mgalwele mu Iraq ma siyasat cjiqe dımaşın acle me zabno d’100 ışne uhulucdo.  Elo bıthır mu huroro da fenyotho du camaydan mu tukoso marhıbono d’Dacış, hedor 60% ma galwoye du camaydan daciriwo la botathe bi daşto d’Ninwe, u adyawma’ste kmitaqwın a şartat di mşaynutho udu momuno-lo belhude leşan a galwoye du camaydan dkıtne bu qlimo d’Kurdistan d’ducri li daşto, elo leşan u camaydan kule dıkhoye bi golutho dımhalıq dawse du dcoro lu athro, dilonoyith bıthır mu sabro rabo dhula i socurutho du Papa Mor Fransis lu Iraq bu yarho d’Odor dşaficina, dmahıtle i şetısto qamayto du maşıqlo du dcoro du camaydan lu athro.