877 farsufe htifi b’Afrin ma hayle Turkoye

Tukoso da zedqe noşoye bu garbyo d’Suriya, frısle taşroro cala farsufe dıhtifi ba 2020 ma marhıbone noqufe d’Turkiya bı dukotho frişe du garbyo u du madınho d’Suriya.

 Me gabo hreno, u mşalo du Komisyon d’Emwotho Mhaydotho mqabıl di marhıbonutho mawdacle, dhol 27 alfo tloye da marhıbone d’Dacış dkıtne bi maşritho d’al Hol, klozım dmitadcıri lan athrawothathe.

Lfuth u taşroro dıfrısle The Syrians for Truth and Justice-(STJ) u Tukoso di Şrorutho udi Kinutho leşan a Suriye, hol 877 mdinoye htifi ba 2020 ma ğrobe marhıbone dkıtne noqufe da hayle kaboşe d’Turkiya uda istixbaratayda b’Afrin bu garbyo d’Suriya. A htofani hawın, walaw i saqıbloyutho huwola şudoyo dsaymo buhone bi sbuthathe u dmaklıyo a marhıbonani d’Turkiya b’Afrin, Tel Abyad u b’Rişcayno.

U mşalo du tukosano Bassam al-Ahmad mawdacle’ste dhol 900 mdinoye msiki u belhude 420 menaye marfın hire wi ctidutho dan 457 hrene, heş latyo idicıto. Beyn da msikoyani, kitoste 8 tloye u 70 neşe-4 ma tloye u 18 neşe marfın elo a hrene noşo lıkodıc hayko’ne. Dilonoyith ba 2 yarhe haroye da 2020, naqısiwo a htofe wa msoke bu qlimano cal da marhıbonani, mşadriwo me Turkiya l’Qarabax leşan dımharbi cam Azerbaijan mqabıl dan Armınoye.

Cali aykanoyutho du garbyo udu madınho d’Suriya, u mşalo du Komisyon d’Emwotho Mhaydotho mqabıl di marhıbonutho Vlademir Voronkov sımle mamlo bu Mawtbo di Mşaynutho d’Emwotho Mhaydotho u grışle athmıl u zuhoro calu mınyono da marhıbone uda yaqrothathe dkıtne bi maşritho d’al Hol b’Suriya.

Voronkov makadle, dkito adyawma 27 alfo tloye bi maşrithathe, dıklozım dmitadcıri lan athrawothathe, dloste kito qento rabo, da nacimani’ste dmisomi radikal du ideoloji da marhıbone d’Dacış. Bi maşrithathe kito tloye me 60 athrawotho frişe u hani kıtucni i mşalutho da nacimani-dıklozım dmiqadamlın xıd dıbhe wa nacimani, lıklozım dmitahti ba hbuşye u dmıhkomi.