01/02/2025

A comure di qritho Armınoyto d’Vakıflı (Hatay) kıloqın rdufye u hboso qaşyo mi şultonutho d’Turkiya

İ qritho d’Vakıflı dkiba 150 comure Mşihoye, u dıknuflo bu taymno du qlimo d’Hatay d’Turkiya u qarıwto lu thumo d’Suriya, i qritho harayto dan Armınoye b’Turkiya’yo. A comure di qrithathe dım’athrowa mi zalzale da 2023, kıloqın rdufye u hboso qaşyo mi şultonutho d’Turkiya.

VAKIFLI, Turkiya – Bıthır mi zalzale dhawyo’wa bu tayman madınho d’Turkiya bu yarho d’Şbot da 2023, hzewole u qlimano u acme’ste dukotho d’Suriya, husrono rabo. Hdo ma dukothani du taymno d’Hatay b’Turkiya, i qritho harayto dkıtte an Armınoye b’Samandağ’yo. Elo, lfuth i dafo di Bianet, i aykanoyutho casqo di qrithathe d’Vakıflı, latyo ucdo belhude mi zalzale dhawyo’wa, elo u qento du şuhlofo demoğrafoyo’yo dıkmibıc dmisım’yo.

An arcotho wa mulkone da 150 comure di qrithathe, kubco i dayira du şuşoto da bote-TOKİ, dmahto ido aclaye bu hboso dıksaymo calan Armınoye di qritho-awkith i mdabronutho d’TOKİ, kubci bi zorriye d’zawno a botani da comure leşan dqudro dmafito la haye i tarmithayda du bnoyo d’bote hathe.

Bi tarmithathe, kubco i mdabronutho d’TOKİ dbınyo 1.353 bınyone d’bote hathe bu qlimano-dıkhobış’ste bıgawe an arcotho di zarocutho wa bote di qrithathe dan Armınoye dkıtne hın menaye zwine mi Xazina du athro. Calathe a comure mawdaclın u ğamo wi zuctho dkıtte cala hbosani dıkmisomi aclaye u dgıdobın husrono rabo li qrithathe uli yortuthayda i makthabzabnoyto.

Bıthır mu mafqono dhawi’wo bu zabno du Sayfo dan 1915, fayış mınyono nacimo d’Armınoye bi fnithathe. An Armınoye’ste xıdu camaydan u Suryoyo b’Turkiya kıloqe ba qetre dan arcothathe dıkmitafiti lu duyoqo di Xazina u walaw u bethdino Nomusoyo fsıqwole ba 2022 dmitadcıri an arcotho kbişe la morathe a qonunoye, heş lo madcıri u kımdawım u qetrano da Mşihoye b’Turkiya.