A Demoqratoye mraşahe Joe Biden la guboye

U gabo da Demoqratoye d’Amerika, mbayanle ruşmoyith Joe Biden u mraşhayde la guboye di rişonutho d’Amerika.

 Ba guboye di rişonutho dgımisomi b’Amerika tlotho bu yarho d’Teşrin u haroyo dıbqamuthayna, gıdloqe Biden u mraşho da Qutnutho Donald Trump-dkıtyo ucdo u rişono du athro.

Bıthır mıd amathlone da 50 marcıyotho trelın mi mraşhonuthathe dıla guboye di rişonutho d’Amerika, fayışwo u muroyo haroyo beyn da mraşhe du gabo da Demoqratoye u senator d’Vermont Bernie Sanders u du mcadrono du rişono catiqo du athro Joe Biden dhani da 3 naqlatyo dkımraşıh ruhe la guboyani di rişonutho.

Bu lumodano dsımle u gabo Demoqratoyo dhadırle mınyono celoyo d’farsufe idice, bi harayto mawdıc d’Joe Biden dkıtyo cımre 77 eşne, mnaqe ruşmoyith u mraşho du gabo da Demoqratoye la guboye di rişonutho d’Amerika dgımisomi 3 bu yarho d’Teşrin u haroyo dıbqamuthayna.

En dılo nofıq ucdo mede dlıkmıntarwo kmıntır ramhıl Biden dmaqbıl ruşmoyith i mraşhonuthathe u gıdloqe u rişono ducdo Donald Trump, dkobıc dımdawım bi wolithayde dawro hreno. Bu lumodano da Demoqratoye, sımwolaste i bathzawgo du rişono catiqo Michelle Obama mamlo u sımwola Trump sturyo.

Mqadım tahınyotho u kuşore l’Joe Biden ma hadome kulle elo belhude 2 mşale da Demoqratoye latwın bu renyo di mraşhonuthathe u lo mqadamlın a tahınyothathe l’Biden wa farsufaniste imathlonitho Alexandria Ocasio Cortes wu folitiqoro d’Michigan Bob King dabici d’Bernie Sanders xıd mraşho la guboyani.