A Ezidoye mahwelın awyutho cama hayle du sutoro d’Ezidxan

Ban alfayo d’Ezidoye layimi adyawma d’Şigur bu garbiyo du Iraq, leşan dmahwın i awyuthathe cama hayle du sutoro d’Ezidxan dıkmıtlıb menaye dmıgroşi mi fnitho.

Meqım mıd dmitaybo taglitho, a hayle Iraqoye mnaselın dmınci a Ezidoye dmıştawtıfi li taglitho, u marıslın buğre bi hawa leşan dmazici a mtagılyone dıkfixi ma qıryawotho mşahılfe dkıtne hedor d’Şigur.

 İ Mdabronutho yothoyto d’Şigur bu knuşyo dsımwola athmıl, mawdacwola dgıdmitayıb adyawma taglitho rabtho bi mditho d’Şigur, bnişo dmitahwe snodo la haylawotho du sutoro d’Yezidxan dıkmıtlıb dmıgroşi ma nuqazyothaththe dkıtne b’Şigur, udmitahwe hfuxyo mqabıl da tehdide da haylawotho Iraqoye.

Cali qroytathe, adyawma a’Yezidoye bu zabno dımşarelın dmıkfoxi ma qıryawotho mşahılfe lu qentrun di mditho d’Şigur, a’haylawotho Iraqoye kalın b’fothaye u mnaselın dmınci a’Yezidoye mi mıştawtfonutho li taglitho. Ba buğre dmarıs bi hawa ma haylawotho Iraqoye, mçarıh hdo athro ma comure di qritho dı Tel Caziz dkıtwın azole li mditho d’Şigur.

Elo cıl mu hboso uma tehdide dsimi, adyawma ba olufe dımtagılyone Yezidoye u acmaye ste mathlone ma came hrene, layimi bu qentrun di qastra d’Şigur, u mawdaclın dıkrıfdi dmitawfıqi a’haylawotho du sutoro d’Yezidxan m’Şigur.

Adyawmaste bıthır mıdkamilo i taglitho, a’mathlone da Yezidoye hawilın knuşyo cam mşale di şultonutho Iraqoyto bi mditho d’Şigur. Bi ytawtathe a’mathlone da Yezidoye makadlın dkıtne masre camu sebyonaththe, udlıkmanhıti katfo mqabıl du zedqo dkıtlın dhınne dsaymi u sutoro du cafraththe u dımdabri a’sebwothaththe. A’mathlone Yezidoye dmahwelın u snodaththe la haylawotho d’Yezidxan, rfıdlınste u qyomo dımdewo bayn di şultonutho du Iraq wu gabo demoqratoyo Kurdistanoyo di KDP bu yarho d’Teşrın u Qadmoyo i şato da 2020.

Bu huthomo du knuşyano, a’Mşale Iraqoye makadlın dgıdnıqli a’talabe da Ezidoye li şultonutho d’Boğdod.