A Ezidoye mathkarlın a sohde d’Xanasor b’Şigur

A Ezidoye d’Şigur du garbiyo du Iraq, mathkarlın a sohde du hçomo dsımwo cali qastra d’Xanasor ba 2017.

 Ba mowat d’mtagılyone dımhalaxlın bi qastra d’Xanasor, makadlın dıklozım u ağunathe dımdawım, hul dmitadcarle u camo Ezidoyo i hiruthayde wu neshonayde, u dmımnıc u kboşo du sebyonayde.

Athmıl u yawmo şatonoyo we du hçomo dsımwo cali qastra d’Xanasor bi fnitho d’Şigur bu garbiyo du Iraq. Tlotho bu yarho d’Othır i şato da 2017 sımwo hçomo cali qastra d’Xanasor dımdawamwole arbıco yawme. Bu yawmano a’mzayne d’Roj wa grube du gabo demoqratoyo d’Kurdistan di KDP, sımwolın hçomo cala haylawotho du mrodo d’Şigur ucala haylawotho du sutoro camonoyo dkıtwın bi qastra d’Xanasor bnişo dkıbşiwo i fnitho. Ubi netiçe da hçome dsımiwo qtılwo menyono d’mharbone u mdinoye u gelyunore.

Callathe, ba mowat d’Yezidoye mhalaxlın athmıl mu qentrun di qastra d’Xanasor huli duktho dıqtiliwo eba amharbone wa mdinoye Yezidoye. A’mtagılyone dıtcınlın a’othwotho u surotho da sohdaththe, ba slogane dmazcaqlın mhanelın u mrodo wu ağuno dkobın a’mharbone d’Şigur.

U gabo di hirutho udi demoqratoyutho da Yezidoye, u zawco da neşe Yezidoye wu mawtbo di qastra d’Xanasor ba mamle dsımlın, krıhlın i siyase dkımmaşela u gabo di KDP bhaq du camo Yezidoyo, u makadlın ste du ağuno dkobın a’Yezidoye gdımdawım hul dmitahwelın i hiruthaththe udmitadcarlın u neshonaththe.

Camgabıdathe, u mawtbo da yaqrotho da sohde Yezidoye, bu buyono dıfrısle athmıl mathkarle a’sohde d’tlotho Odor di şato da 2017 wa sohde du qtolcamo d’Şigur dı tlotho Ob di şato da 2014.