A Fleştoye fayış kımahwın u hfuxyathe mqabıl du zawco d’Hamas wu hani 2 yawme, kımdawmi a tagliyothathe bu garbyo d’Ğaza mqabıl du qrobo dıkmdawım

ĞAZA – A Fleştoye fayış kımahwın u hfuxyathe mqabıl du zawco d’Hamas wu hani 2 yawme, kımdawmi a tagliyothathe bu garbyo d’Ğaza mqabıl du qrobo dıkmdawım. Ba protestowiyani a Fleştoye dcayifi mi aykanoyutho mahişonitho du Xtuto kımazcıqi u kımmi-Leşan Aloho, nfaq Hamas! Basyo lu qrobano!

Ha ma mtagliyone mırle; U camo batıl u cayıf mi aykanoyuthathe. En u şroyo du qrobano d’Hamas dtore me Ğaza’yo, qay inaqlayo lıktore u Xtuto leşan u sutoro wi mşaynutho du camo. Elo bi sbuthathe’ste fqido d’Hamas kıtohım hayle folitiqoye dkıtne bıthre di sbuthathe u dıkmıstacmıli a tagliyothani lu yuthronathe. 

U tbocofroso Emwothoyo, heş latyo m’akdo manyo bıthre du şeçoco la tagliyothani da Fleştoye mqabıl d’Hamas elo kımawdıc, da tagliyothani mıdlın duktho rabtho u mbarbızi bu telegram wu lfuth CNN, i taglitho dsimo athmıl mfaşqo i rabtho dhawyo mu zabno d’Hamas hçımwole cal İsroyel ba 2023.

Me gabo hreno mawdıc, da tayosyotho d’İsroyel sımlın athmıl b’lalyo cuqobo oyaroyo cal Ğaza u qtilın iqartho d’6 farsufe u acmaye’ste u malolo du zawco d’Hamas Cabdel Latif al Qanoua u mınyono hreno d’Fleştoye’ste mçarhi. Camathe Hamas gzımle İsroyel dmaklıyo a cuqobayda, dloste a yasire dfayşi msike-gıdmitadcıri ba nahşe l’Tel Aviv.

Hamas kımawdıc’ste, dıksoyım kull mede leşan dfayşi a yasire ba haye, elo a hçomani dıksaymo İsroyel, kımşakli qento la hayathe. Mqabıl du mamlano d’Hamas, u rişwazire Netanyahu m’kararle dgımaydi dukotho frişe d’Ğaza, en dothe u zawco dlo marfe a yasirathe. Calathe’ste İsroyel huwla adyawma u gzomo haroyo la Fleştoye dmatrıki a dukothani b’Ğaza.