A fulhone dmihathıthi a darbone d’Bağdede heş kımdawmi

A’fulhone du hethotho da darbone kımdawmi heş bi mditho Suryoyto d’Bağdede di daşto d’Ninwe.

Lfuth u qaymaqam d’Bağdede, mabdın ucdo a’fulhone du hethotho du darbo rişoyo dkımşare mu garbiyo du qentrun d’Bağdede lafi qastra d’Karamles.

U qaymaqam di qastra Suryoyto d’Bağdede di daşto d’Ninwe Cisam Bahnam Matti, mawdacle da fulhone du hethotho da darbone bu isfalt kımdawmi b’gawıd di mditho.

U qaymaqam Matti mawdacle dmaslım i şabtho dşaficina nuqazto hathto bı Bağdede lıhdo şırke du isfalt laşan dmisım u hethothayda. I nuqaztathe knıflo bi xasra garbyayto du cboro nfoqo du qentrun d’Bağdede.

Lfuth i tarmithathe, mabdın ucdo a’fulhone du hethotho du darbo rişoyo dkımşare mu rendel du Slibo ub’yurxo d’600 mıtrowiye lasfi qastra d’Karamles cama ganotho d’hedore. U darbano u hatho gıdhowe mdarbıd du darbo catiqo dkıtwe bıhdo xasra.

I şırke du isfalt baroyo bıthır mıdmasılmo i nuqazto hathto, mşarela bu hethotho du zabuqo hatho bi mıştawtfonutho du mdabrono da karxıwotho d’Ninwe Racıd Alhadidi wu mdabrono di qastra d’Bağdede Rami Soni.