A gabe d’Turkiya mahwelın hfuxyo mqabıl da hjome dhawın cala Armınoye

U qoyumo du cameydan Tuma Çelik, u qoyumo Armınoyo Garo Paylan u mşale d’gabe u şutose b’Turkiya, mahwelın u hfuxyathe mqabıl da tahdide dımqadmi lu waqıf d’Hrant Dink.

 Ba maqırhonwotho dıfrisi mu gabo d’HDP, CHP, DEWA wu gabo Dactid u ğalabe şutose u farsufe idice, mahwelın u hfuxyathe u krıhlın a mşale di şultonutho dıksaymi mamle di bcelıdboboyutho.

 Bi maqırhonutho dhuwlın atre qoyume du gabo d’HDP Tuma Çelik u Garo Paylan krıhlın a hjome haroye dsimi cala Armnoye u dilonoyith, cali egartho du gzomo dımşadro lu waqıf du gelyunoro Armınoyo Harnt Dink.

A qoyume bi maqırhonuthathe kımmi; A mele wa maqırhonwotho haroye dhawın ma mşale di şultonutho, dkibın bcelıdbobutho u mamtelın cam ruhaye a sebwothani dımşarelın dhowın qento la bnaynoşo dlatne sanode di şıltonutho u dilonoyith la came Mşihoye xıd Armnoye, Suryoyo u ğer.

I sbuthathe du gzomo trela ğalabe gabe u şutose dmahwın hfuxye u bebzabno dmahwın awyutho camu waqıf d’Harnt Dink. U gabo d’CHP u HDP, DEWA, u gabo Dactid u gabe hrene, ba buyone uba maqırhonwotho dfrıslın krıhlın u tahdidano u mawdaclın dlıkmaqıbli a gzomani. Ba maqırhonwotho dsımlın a rişone da gabani, kımahwın mıqa kımaydi i sbuthathe jiddi.

A şutose camoye’ste huwlın maqırhonwotho u krıhlın a gzomani u mırlın; İ sbuthathe, sbutho maziconitho’yo u latyo mede dıkmitaqbıl, dkull naqla a rişone di şultonutho dsaymi mamle di bcelıdboboyutho udi frişutho da came. Ba 2007 u gelyunoro Armınoyo Hrant Dink qtılwo qum caynothe du camo bıthır ma gzome da mşale di şultonutho du zabnano-awkith i şultonutho d’AKP dkıtyo bi rişonutho du rişqutno Erdoğan.