A gabe Lebnonoye saqıbloye Mşihoye u Maşılmone mahwelın hfuxyo cala taxtuşe dhawın hedor du bethdino d’Beyrut
I sbutho du mbaqrono Tareq Bitar kımdawmo dfayşo bu yawmoyo d’Lebnon, bu zabno dıkmnase u gabo d’Hizballa wu Zawco d’Amal dmıstacımli i sbuthathe, leşan dtufki u athro lıqrobo gawoyo hatho, u dmafiti la haye i tarmitho dkıtle u İran bu qlimo du Madınho Mescoyo.
Adyawma a gabe Lebnonoye saqıbloye Mşihoye u Maşılmone bu hfuxyo dmahwelın cala taxtuşe dhawın hedor du bethdino d’Beyrut, mawdaclın dmıdlın tedbire di mşaynutho ba fenyothathe, bnişo dılo motelın a taxtuşani.
Adyawma safrayto u qento da taxtuşe frısle u telolayde cala fenyotho d’Altayyuna, Alşayya(h) ud’Cayn Alrımmane b’Beyrut. Adyawma safrayto hawi mhoyo qaşyo da buğre, hloqo d’foqucotho u taxtuşe beyn d’mtagılyone noqufe d’Hizballa udu Zawco d’Amala da Maşılmone Şica d’Lebnon dlayimi mqabıl du bethdino d’Beyrut u farsufe hrene mzayne dlatne idice dımbarbızi cali goro dhın benyone dkıtne qariwe lu bethdino.
Amtagılyone laymiwo, leşan dmahwın i cajaze dkıtle Hizballa mu dayono Bitar dkobıc dmagle cali şrorutho du furqoco du lmino d’Beyrut u dmimıd hşowo ma hayobe. Bi netiçe da taxtuşe dhawın, qtil 6 farsufe u ba casrowat hrene mçarhi hulu zabno dsımlan u tebano. Camgabıdathe, a comure dkıtne qariwe lu bethdino mahzamlın ma botathe mi zuctho dhawi ma taxtuşani.
Calathe, u rişqutno Mişel Caun wu rişwazire Nejib Miqati hawilın esore camu rişono du gayso leşan dmaşlın i aykanoyutho d’Lebnon, ubebzabno sim knuşyo şnizo bu Mawtbo di mşaynutho Athronoyto, bu zabno dıkmnase Hizballa wu Amal dtufki athro l’qrobo hreno gawoyo. U gayso bi maqırhonuthayde mawdacle da hayle dımbarbızi bi mdito d’Beyrut, gıdmarisi buğre cal kull farsufo mzayno dgıdhowe ba zabuqone yaste cal kull farsufo dgımarıs buğre, wu gayso tlıble’ste ma mdinoye dlo fayşi ba zabuqone.
Cala şuşote dhawın adyawma, a mabuce dkıtlan b’Beyrut mawdaclın du mede dhawi qariwo lu bethdino masrahto’yo dımtaybole Hizballa bnişo dtofık u maşıqlo folitiqoyo d’Lebnon l’ğer duktho, mi celtho da hbose rabe dkowın acle mu kenşo Emwothoyo dıbritho, bnişo dımhalıq u zaynayde dlatyo ruşmoyo, u dforış ruhe mi tarmitho İranoyto.
A gabe Lebnonoye saqıbloye beynothaye u gabo da Haylawotho Lebnonoye, a Katayeb, an Athronoye Hire, u gabo du Huyodo Suryoyo Tibeloyo, cam gabe hrene Mşihoye u Maşılmone b’qaşyutho krıhlın a dyoşe dıkmisomi calu camo ucalu athro mu gabo d’Hizballa umu Zawco d’Amal dıkmıstacımli u zayno, leşan dmafiti la haye i tarmitho ideolojik du İran. A gabe saqıbloye da Mşihoye uda Maşılmone makadlın’ste du camo Lebnonoyo hiro kule, gıdnofıq mqabıl da grube mzayne dlatne ruşmoye u dıkmnasın dfırsi i moruthathe cal Lebnon, u dtufkile l’qrobo gawoyo hatho.