A hadımyotho d’HNB u fırco d’Göppingen d’Almanya, mıştawtaflın la hfitwotho dımtaybi adşato bi cohnutho du yawmo da Neşe Falıhyotho d’Britho 8 Odor

GOPPINGEN, almanya – Lfuth i mawdconutho dmatilan mi mdito d’Göppingen, a hadımyotho du Mawtbo du Huyodo da Neşe d’Bethnahrin cama noqufe hrene da şutose du Mawtbo Umthoyo d’Bethnahrin; beynothaye ESU Youth, hadiri a hfitwotho dsimi bu wahdo du qentrun di mdito. A hfitwothani dıkmisomi kull şato b’Göppingen-hawın xıd mardutho beyn da came di mditathe.

İ hfituthathe dımtaybo ma şutose da came frişe dıkhoyın b’Göppingen, frişo lu yawmo d’8 Odor u sim eba mamle; beynothaye Azex Taybek dkalyo cali ulsoyutho du mrodo da neşe leşan i şawyutho b’britho. Cal ışme d’HNB Helana Cabdo mathkarla u xtuto d’HNB u mırla; Ahna dkıtna ağuno d’Sohde, kıcayşina kull kewo u casqutho di qale dhulın a neşe b’britho, calathe 8 Odor hawi remzo du mrodo leşan kenşo dhowe şawyo dıkmaxlıs i umthaydan u cameydan wa came dişe kulle.

Me gabo hreno a hudre, şutose u tukose da came d’Göppingen wa galwoye dıkhoyın bi mdito-xıd Yawmnoye, İtaloye u Hındwoye, mıştawtaflın a hadımyotho d’HNB lu hago dımtayıb bıthır bi mdito. Bu hagano dsim’ste, a came dhadiri mahwelın i marduthathe wu HNB’ste cama gude du folklore-beynothaye i gudo d’ESU Youth, mahwelın a raqde wi mardutho du camaydan ubu dumyano, fayiti adşato’ste a hfitwotho d’8 Odor b’fsihutho u kaşirutho bi mdito d’Göppingen.