A haylawotho d’Qasad msıke tıre ma mşale folhoye da ğrobe marhıbone d’Dacış bi Hasake

A Haylawotho d’Suriya Demoqratoyto maglelın, dımsıklın tıre ma mşale folhoye da ğrobe marhıbone d’Dacış bu madınho ubu taymno di Hasake.

Bebzabno a hayle di mşaynutho gawoyto di Hasake mawdaclın, ba cuqobe dsımlın athmıl bu garbyo ubu madınho d’Suriya, msıklın 42 farsufe dıkmıthomi bu tuyobo d’hawbe frişe.

Bi maqırhonutho dhuwlın a Haylawotho d’Suriya Demoqratoyto mawdaclın, da Mharbonathe a dilonoye dkobın ağono mqabıl di marhıbonutho, msıklın 2 ma mşale folhoye da ğrobe marhıbone d’Dacış bu madınho ubu taymno di Hasake. A cuqobani’ste simi athmıl mşawtıfo cama hayle du koalisyon Emwothoyo.

Bi maqırhonutho dfriso cala cuqobani QASAD mırle; Bu snodo da cuqobe oyaroye du koalisyon Emwothoyo, a Mharbonaydan sımlın 2 cuqobe frişe-ha b’Markada bu taymno di Hasake ubi netiçe msık u mşalo Dacış dıkmşadarwo zayne la krılyothathe leşan dsaymi hçome bu garbyo ubu madınho d’Suriya. Bi netiçe’ste mahıt ido cal kmoyutho rabtho d’zayne frişe.

Wu cuqobo 2’noste sim qariwo l’al Hol bu madınho di Hasake u msik mşalo hreno d’Dacış dıknoqalwo a rişone wa marhıbonathe leşan dsaymi hçome bi maşritho. Bu cuqobano’ste mahit ido cala alat frişe du teknik. Me gabo hreno a hayle du Asayış di Hasake frıslın maqırhonutho cala cuqobe haroye dsımlın athmıl.

Ba cuqobani, mawdıc dımsik 42 thimoye d’hawbe frişe u mahıtte’ste ido cal mınyono celoyo d’zayne u alat du teknik. Hın ma farsufani dımsiki’ste lwişe’wın lbuşe da hayle di mşaynutho leşan dqudri dımanhıbi u camo, dmahriwi i mşaynutho u dxulqi jğuşyo bi fnitho. Calathe u Asyasış sımle qroyto lu camo dımxabır, inaqla dhowele keşlo cal farsufe dıkm’athri i mşaynuthathe.