A hayle di mşaynutho gawoyto du Garbyo udu Madınho d’Suriya, mabdelın hamle cala krılyotho d’Dacış bi mdito di Qamışlo

QAMESHLO – A hayle du Asayiş du Garbiyo Madınho d’Suriya, mabdelın hamle bi şawtho d’Al Calaya di Qamışlo leşan u kroxo dcala krılyotho du tukoso marhıbono d’Dacış. Lfuth mabuco ma hayle di mşaynutho gawoyto, a haylawothathe cabiri li fnitho u kıkurxi cala marhıbone, cala zayne mnice ucal gelone mtanwone.  

Meqım dımşare a cuqobani, mahıtle u Asayış mnoco du nfoqo du camo di şawthathe leşan dqodır dsoyım a buhonayde. Bi şawthathe dsim u cuqobano, kito u hbuşyo da marhıbone d’Dacış, d’meqım kmo yawme hawiwo şğuşyo ebe.   

Bu zabno du bılbolo da marhıbone, a hayle d’QASAD’ste maqwewolın u duyoqo dhedor u hbuşyano udi nuqazto d’Amerika dkıtyo bi Hasake. Lfuth a mawdconwotho ğnize dmatiwole QASAD, a marhıbone mtaybiwo plan bu hbuşyo ubi maşritho d’Al Hol leşan dmahzımi u dsaymi hçome hathe.   

Bu taro du qentano dıkımşakli a marhıbone bu qlimo, mawdıc du koalisyon Emwothoyo macbarle konvoy d’24 qamyone matcıne folhe u lojistik li Hasake mu thumo d’Al Walid du Garbyo du Iıraq. U konvoyano cabır lu qlimo kmo şuce bıthır mu hçomo dsim athmıl cali nuqazto rabtho dkıtle u koalisyon b’Suriya u dımçarıh 2 farsufe ebe.