29/12/2020

A hayle d’Qasad msıke krılto dı goşuşe d’Turkiya

Ba taxtuşe haroye dhawın b’Cayn Cisa bu garbiyo d’Suriya, arbıco Mharbone ma Haylawotho d’Suriya Demoqratoyto matın lu darğo di sohdutho, u qtil ışto marıhbone ma grube dıkmısnodi me Turkiya.

 Camgabıdathe, a hayle di mşaynutho d’QASAD msıklın bi qastra d’Cayn Cisa krılto da istixbarat dsaymowa ğoşuşutho leşan Turkiya.

 Athmıl ba şoce d’safrayto, sim hjomo hreno ma marhıbone d’Turkiya cala gbine du qrobo b’Cayn Cisa dıknuflo bu garbiyo d’Raqqa. U bi netije du hjomano, hawi taxtuşe qaşye beyn da Mharbone da Haylawotho d’Suriya Demoqratoyto u da grube marhıbone dısnidi ma soruhe du gayso kaboşo d’Turkiya. Uhjomano sim bnişo dmıqtıc u darbo Emwothoyo dıkmasır i Hasake bi mditho d’Holobyo.

Elo a hayle d’QASAD dmaklelın uhjomano u bi netije qtil 6 marıhbone ba  qıryawotho d’Jahbal, Almışırfe, Sayda u Maclaq. Bebzabno, 4 mharbone d’QASAD matın lu darğo di Sohdutho u 7 hrene mjarhi ba taxtuşani. Rusya kobo fsoso l’Turkiya dhıjmo cal Cayn Cisa, bnişo dmisım hboso cala hayle d’QASAD, leşan dmasılmi i fnitho lu rejim d’Suriya.

Elo lfuth ambahnone folitiqoye, QASAD gdobe ağuno hol u nafas haroyo, u lıgmaslım Cayn Cisa dkıtla ulsoyutho stratejikoyto rabtho. Camgabıdathe, a hayle di mşaynutho d’QASAD msıklın b’Cayn Cisa krılto da istixbarat dıksaymo ğoşuşutho l’Turkiya. İ şabakathe dıkmişaklo me 28 farsufe beynothaye hıdo athto, msiki bu duyoqo dsim cali harakathe zabno yarixo.

A hadome di krıltathe mawdelın dsımlın ğoşuşutho lu gayso kaboşo d’Turkiya ula marhıbonayde, u mawdaclın dımşadarlın mawdcınwotho cala nuqazyotho folhoye u cala qentrune di Mdabronutho yothoyto, cal hın farsufe d’QASAD u ğer dıkfulhi bu haqlo di mdabronutho bi fnitho d’Cayn Cisa. Bebzabno, a hadome di krılto mıctaraflın dımtayablın menyono d’furqoce b’Cayn Cisa bu snodo baroyo da istixbarat Turkoye. Wu rişono di krılto meqım mıd mşadır l’Suriya, hzewole droşe bi maşritho da ğoşuşe b’Turkiya.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…