A hayle folhoye du rişono Şica du Iraq Muqtada al Sadır bı qaşyutho hçımlın cala mtagliyone

A noqufe wa hayle folhoye du rişono Şica du Iraq Muqtada al Sadır, bı qaşyutho hçımlın cala mtagliyone ba mdinotho d’Najaf u Karbala. Ba hçomani dsimi, qtil 11 farsufe.

 Calathe i wazirutho di gawoyutho du Iraq huwla amro dmitabde buhone bi sbuthathe, u mşale d’athrawotho frişe dbritho krıhlın a hçomani da Şica cala mtagliyone.

A tagliyotho du Iraq dımşarewolın bu yarho d’Teşrin u qamoyo da 2019, simiwo mqabıl du fassad, di batilutho da şuğlone udi ayaknoyutho harıwto du athro, elo kull dkothe-kmişahlıfi l’tagliyotho folitiqoye u mqabıl di şultonutho, mqabıl du İran uda hayle Şica dıkmısnodi mu İran. Gawonoyith ba tagliyothani dıkmdawmi, qtil holucdo 600 mtagliyone uban alfayo dhrene mçarhi.

Ba tagliyotho dsimi hani 2 yawme ba mdinotho du taymno du Iraq Najaf u Karbala’ste, hçımlın noqufe wa hayle folhoye du rişono Şica du Iraq Muqtada al Sadır, bı qaşyutho cala mtagliyone ubi netiçe qtil 11 farsufe. Mawdıc da hayle d’al Sadır, hçımlın cali maşritho da mtagliyone u qtilın u mçarahlın 210 bnaynoşo dkıtne heş menaye ba bethkrihe.

Calathe i wazirutho di gawoyutho du Iraq huwla amro dmitabde buhone cala hçomani dsimi cala mtagliyone wa buhonani gıdmdawmi, hol dmiqafın a hayobe leşan dmıtlıb hşowo menaye. Bebzabno u rişwazire hatho Mohammed Tawfiq Allawi tlıble da hayle di mşaynutho du athro dımhamın a mtagliyone u tlıble mu camo, dımdawım a tagliyothayde dlo cnufyo.

Elo u cnufyano dmıstacmelın a hayle d’al Sadır cala mtagliyone, grışle u zuhoro du kenşo Emwothoyo; beynothaye i mşalonitho d’UNAMİ Jeanine Hennis-Plasschaert, mşale frişe du Huyodo d’Urifi wi rişizgadutho d’Amerika b’Boğdod u mşale du qlimo d’Kurdistan ubı qaşyutho krıhe u haylo dmıstacmıl mqabıl da mtagliyone.