A hayle kaboşe d’Turkiya wa noqufathe b’Suriya, mazıdlın a dukotho da hçome dıksaymi aclaye bi fnitho d’Tel Temır

TEL TEMIR, Garbaymadinho d’Suriya – Bu zabnano dıkmihalıq dawsat lu terkiwo du maşıqlo folitiqoyo udu şlomo b’Suriya, a hayle Turkoye wa noqufathe’ste mazıdlın a hçomathe cal dukotho mşahılfotho du garbay madınho d’Suriya. Hdo ma dukothani, i fnitho d’Tel Temır’yo dmido hani kmo yawmo naqla hreto nişo la hçomani da Turkoye.

Lfuth i dafo d’Hawar, Turkiya mhela b’dukotho frişe d’Tel Temır u hın menaye u qentrun di fnitho wi şawtho du camaydan u Othuroyo’ne. Ba hçomani dmıstacmıl zayne yaqure, lo mawdıc heş en qtil mdinoye aw lo, elo hiw husrono rabo la bote ula mulkone du camo. Calathe a rdufyani, mfaşqi xıd hçome marhıbone cala comure.

Bebzabno i fnitho dhedor u masxoro d’Teşrin u Qaraqozaq b’Mabuğ uğer dukotho kımdawmi a hçome aclaye, bu zabno du camo’ste kımdawım dsoyım protesto u qedomano u barbroyo d’Turkiya lu qlimo. Ba hçomani da Turkoye dmıstacmıl tayosyotho du qrobo u tayosyotho dlo pilote, mawdıc da hçomani dyoşo da qyome Emwothoye’ne u tlib mu kenşo Emwothoyo dsoyım hboso cal Ankara, dmaklıyo a rdufyani.

A tayosyotho du qrobo da hayle kaboşe d’Turkiya, sımlın’ste cuqobe oyaroye cali qritho d’Sirrin bu taymno d’Kobani elo heş layto mawdconutho calu husrono dhiw. Xıd hfuxyo mqabıl da hçomani d’Turkiya dıkmdawmi hani 3 yarhe dlo kıloyo, a hayle d’QASAD’ste bu funoyo dhuwlın ba cuqobathe, madrelın 4 tayosyotho dlo pilote u 2 sisteme du radar.