A hayle oyaroye du Iraq sımlın 25 cuqobe cala marhıbone b’Kerxeslox

U rişwazire du Iraq Mustafa al Kadhımi mawdacle, dımsıklın u marhıbono dıkmitıftakır dkıtyo bıthre da hçome barbroye d’11 İlül da 2001. U marhıbono, bebzabno kmıthım bu hçomo qaşyo dsımwo bi şawtho d’Karrada d’Boğdod ba 2016.

Bu zabno du gayso Iraqoyo maqwele u duyoqo di mşaynutho d’Boğdod, mawdıc da hayle oyaroye sımlın 25 cuqobe cala marhıbone b’Kerxeslox.

U rişwazire du Iraq u malolo du gayso Yahia Rasool m’akadlın, msıklın u marhıbono Ğazwan Alzawbac dıkmidıc bu ışmo Abu Cabida dhani zabno yarixo kmıkraxwo acle. Mawdıc du marhıbono, kmıthım hem dkıtyo bıthre da hçome marhıbone dsimiwo cal Amerika ba 2001uhemste da hçome barbroye dhawın ba 2016 bi şawtho d’Karrada d’Boğdod.

Bu hçomano, qamyun malyo foqucotho mfarqacwo qentrun da dukane b’Karrada ubi netiçe qtılwo 320 farsufe. U hçomano’ste mıdwole Dacış i mşaluthayde. U msokano’ste hawi, bıthır me fulhone mşawtıfe bu haqlo da istixbarat Iraqoye u nuxroye. Bebzabno u koalisyon Emwothoyo mawdacle da hayle oyaroye du Iraq, sımlın 25 cuqobe cala dukotho da marhıbone bu taymno d’Kerxeslox u mahrawlın 5 dukotho du lojistik u qentrune d’Dacış.

A cuqobani’ste simi xıd funoyo cal d’zayidiwo a hçome marhıbone b’Kerxeslox u hedora. Camgabedathe, u gayso Iraqoyo mşadarle hayle di mşaynutho li arişkoyto Boğdod, bıthır ma gzome dsimi ma ğrobe msalhe da Şica dıkmısnodi mu İran. A noqufe du Huyodo d’Fatah sımlın athmıl taglitho u gzımlın dgısaymi hçome mqabıl di hile dsimo ba guboye gawonoye du athro.

U Huyodo d’Fatah dkıtyo bi rişonutho d’Hadi al Amiri u dıkmısnıd mu İran, mıdwole 48 kurisye ma 329 dkito bu parlamento ba guboye dsimiwo ba 2018, elo ba guboye dsimi 10 bu yarhano, mıdle belhude 17 kursiye bu parlamento.