A hayle Şica da Houthiye d’Yemen, maqbelın dmaklın i mtaksutho wu siticmal da tloye xıd folhe bu qrobo
A hayle Şica da Houthiye d’Yemen, maqbelın dmaklın i mtaksutho wu siticmal da tloye xıd folhe bu qrobo dıkmaşın mqabıl du gayso du athro. U malolo d’Emwotho Mhaydotho m’akadle u mırle; A Houthiye maqbelın u plan dımbayanlan, leşan naqla hreto dlo jubri udlo mtaksi nacime li folhutho.
YEMEN – U malolo d’Emwotho Mhaydotho Stephane Dujarric, huwle maqırhonutho cala tloye dıkmitıstacmıli xıd folhe bu zabno da qrobe ubi sbuthathe, kali dilonoyith cala hayle da Houthiye d’Yemen dıkmısnodi mu İran. Elo mawdıc’ste, da Houthiye ucdo mdelın u plan d’Emwotho Mhaydotho leşan dmitakle u isticmal da tloye xıd folhe bu qrobo dıkmaşın mqabıl du gayso d’Yemen udu koalisyon di Scudiye.
A Houthiye jubriwo a nacime-clayme u claymotho dsaymi hçome cala madraşyotho, cala bethkrihe uğer hçome barbroye. Dujarric mırle; A Houthiye maqbelın dımbayni b’zabno d’6 yarhe a tloye kulle u dmawfıqıne me beynothaye. Bu tarano, a gabe kulle dkıtne bu qrobano mdelın u qyomano leşan dmaklın i mıştawtıfonutho da tloye ba qrobe u dlobın aftho la dyoşe da zedqe da tloye.
Bu taşroro frıswola Emwotho Mhaydotho bu yarho d’Konun u haroyo dşafıcina mawdacwola, dhol 1500 tloye dımtaksiwo ma Houthiye du İran ba 2020 qtiliwo bu qrobano d’Yemen uhol 500 hrene qtiliwo ba 2021. Bu qrobano dıkmdawım ma 2015 uholucdo, qtil gawonoyith 10 alfo tloye b’Yemen.
Bu yawmo qamoyo du Ramadan da Maşılmone, sımwo şalyuthzayno beyn da Houthiye udi şultonutho dıkmawde u kenşe Emwothoyo eba. A 2 gabe du qrobano matınwo l’awyutho, dmaklın a hçome di naşfe, di hawa wa hçome dıkmisomi mcala thume u dobın aftho la sfinotho rabe, dcubri lu lmino d’Hodeidah, dmıftıh u bethtawso d’Sanaa u dmitaqım u kboşo mcali mdito d’Taiz.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
