A hçome wa mhoye kimdawmi bu Swed

STOKHOLM – A haye rakiwe wi mşaynutho di ciyeşe bu Swed, hariwi ğalabe ba eşne haroyani. Me 25 bu yarho d’Konun u qamoyo da 2022-bu qatlo d’farsufo d’27 u dkıtwe idico beyn da ğrobe hayobe uhol adyawma-1 bu yarho d’Şbot, taqriban yawmoyith hawi şıkıl d’hçomo zaynoyo, furqoco u qale b’Stockholm u hedora.

Mathlo la hçomani dıkmbasina aclaye kito; Adyawma bi mdito d’Södertelje, mhe buğre du zayno b’bayto. Bu mhoyano noşo lo mçarıh elo u hçomo mahıt bu taro-d’nesyuno du qatlo u hawbo du zayno. 29 bu yarho dşafıcin, hawi 2 furqoce bu garbay macırbo d’Stockhol u naqla hreto noşo lo mçarıh. 28 bu yarho dşafıcina, qtil claymo bu mhoyo du zayno dhawi qariwo l’resturang b’Skogos, 27 hawi furqoco b’bınyono dbote b’Akalla, 26 hawi furqoco b’Botkyrka, 25 bu yarho sim hçome zaynoye b’Södertelje-ubu dumyano, sim hçome yawmoyith bu Swed u qtil u mçarıh mınyono dıbnaynoşo u msik’ste farsufe dıkmıthomi bu tuyobo da hçomani.

Şwolo dkıtyo makiwono’ste, di sagiyoyutho da hçomani simi me clayme b’cımre nacime’yo dkıtne beyn 14-15 eşne. Hathe kımadilo, aydarbo a ğrobani kımtaksi clayme b’cımro nacimo leşan dsaymi a hçomathe. Bu zabno da hçomani’ste msıkle u polis mınyono dfarsufe la buqore uğer’ste marfın, cal dlayto ithbate makfıyone mqabıl dıthe. U polis’ste, kımdawım ba buhonayde leşan dımqafe şıkıl d’asirutho beyn da hçomani.