A İmarat Caraboye Mhayde gmarkıwi rişizgadutho b’İsroyel Tel Aviv
A İmarat Caraboye Mhayde fsıqlın, dımarkıwi rişizgadutho bi arişkoyto d’İsroyel Tel Aviv. I mawdconuthathe hiwo, mu waziro di baroyutho da İmarat Caraboye Mhayde Anwar Gargaş.
Megabo hreno u İran, dmahwewole hfuxyo lu qyomano dbeyn Tel Aviv udi şultonutho d’Abu Dhabi, kbışle athmıl sfitho da İmarat Caraboye dkıtwa şafıcto ba thume du yamo du İran.
Bu video konferans dsimo cami mathlonutho d’Amerika bu NATO, u waziro di baroyutho da İmarat Caraboye Mhayde Anwar Gargash athmıl mawdacle, dmıdlın fusqono dmarkıwi rişizgadutho bi arişkoyto d’İsroyel Tel Aviv. I rişizgaduthathe, gıdmitabde bu terkiwayda, bıthır mıd mıde ruşmoyith tahte du qyomano dsim can İsroyel.
Bu mamlayde Gargash mırle; Abu Dhabi gıdmarkıwo i rişizgaduthayda b’Tel Aviv cali arcutho da qyome Emwothoye dsimi leşan u terkiwo d’2 athrawotho şarye awkith d’İsroyel uda Fleştoye. İ dawsathe dımhalqo cam İsroyel, gıdxılqo mkone u gade rabe la 2 athrawotho hınne kibın dfuthi şuğlone harke, u ahnaste gıdzawnina tayosyotho du qrobo b’F-35 me Amerika.
Me gabo hreno i wazirutho di baroyutho du İran mawdacla, dıkbışlın sfitho da İmarat Caraboye Mhayde wa falohe kulle dkıtwın bıgawa. İ celtho du kboşanoste mawdıc di sfitathe dışwola a thume du yamo du İran. İ wazirutho İranoyto mawdaclaste, da hayle du yamo da İmarat Caraboye, qtiwolın 2 İranoye sayode da nune bu yamo dıkbişo i sfitathe.
U İran mawdacle, da İmarat Caraboye tlıbwolın şubqono calu gedşano du qatlo da 2 İranoye, elo a İmarat Caraboye lo huwlın fuşoqo l’Reuters bhaq du tebano di sbuthathe. Calu qyomo dhawi beyn da İmarat Caraboye Mhayde u dı İsroyel, thımwole u İran a İmarat bi xiyene u krıhwole u qyomano dhawi beyn da 2 athrawotho.