A jatawiye d’Turkiya ocdo kmıştawtıfi bu qrobo d’Azerbeijan

İ wazirutho du sutoro d’Armenya makadla da jatawiye d’Suriya dıkmısnodi me Turkiya kmıştawtıfi ucdo lu qrobo cama haylawotho d’Azerbeijan mqabıl da haylawotho d’Armenya.

 Camgabıdathe, qoyumo Armınoyo mawdacle da jatawiye dı Turkiya mşarelın dmanhıbi a dukane wa mulkone da mdinoye ba dukotho dımşadri elaye b’Azerbeijan.

İ malılto ruşmoyto di wazirutho du sutoro d’Armenya Şuşan Stipanyan, bi maqırhonutho dhula cal leşonıd du rişqutno d’Qarabax Arayk Harutyonyan, makadla dkito jatawiye Suriye dıkmıştawtıfi lu qrobo cama haylawotho d’Azerbeijan dıkmısnodi me Turkiya. Stipanyan makadlaste d’Armenya hadırtoyo dsındo ahaylawotho di mudafaca d’Qarabax bnişo dsaymo u garanti di mşaynutho da bnaymothoye du qlimo.

Meqım matheste, i şultonutho d’Yerivan mawdacla dkito hedor 4 alfo jatawiye Suriye dıkmıştawtıfi lu qrobo mqabıl da haylawotho d’Armenya.

Camgabıdathe, u qoyumo Armınoyo Fahagen Tifosyan bi maqırhonutho dhule lu ajans d’Armen Press, mawdacle da jatawiye d’Suriya dımşadrila Turkiya laşan dhıjmi calu qlimo d’Qarabax, mşarelın ucdo dmanhıbi adukane wa mulkone da mdinoye b’Azerbeijan.

Qoyumo Tifosayn mırle “a comure da qıryawotho b’Azerbeijan kmaşkın ma jatawiye dkımnasın djıbrilın dımtabqi i şarica Maşılmonoyto, mawxaste kmınci a neşe dnıfqi dlo hijab wa bnaynoşo ba zabuqone kmitanhıbi”. Tifosyan mırleste “u rejim d’Azerbeijan bi rişonutho d’Cali Yev, kızeyo laf shofo cal dıkmıstacmıl a jihadist bu qrobo mqabıl d’Armenya”.