A mele naşife beyn du Yawnan u d’Turkiya bi sbutho d’Ayasofia kımdawmi

A esore beyn d’Turkiya udu Yawnan ba yarhe haroyani zıttır m’watın wu fusqono dmıdla Turkiya dımşahlıfo i cito d’Ayasofia l’masığdo, trele u qrobo da mele beyn da 2 athrawothaniste zıttır dı qoşe.

 Bıthır mıd a Turkoye msalelın bi citoste, a mşale da 2 athrawotho krıhlın a qedome, a thome wa maqırhonwotho dıhdode.

 I şultonutho d’Athena du Yawnan u d’Ankara d’Turkiya, mıstacmelın naqla hreto mele naşife mqabıl dhıdode dilonoyith, bıthır mi slutho dsimo yawme d’Cruto bi cito d’Ayasofia, dmaqlıbole u rişqutno Turkoyo l’masığdo ubi sbutho di catirutho du enerji dkito bu madınho du yamo Mescoyo.

U rişqutno Turkoyo Recep Tayip Erdoğan athmıl mırle; U nişo dan athrawotho dıksaymi ğalabe qolo u qarabalıq bu zabnano, latle asirutho cam Ayasofia wu madınho du yamo Mescoyo. U nişo dan athrawothani, i ithutho d’Turkiya uda Maşılmone bu qlimanoyo.

Erdoğan krıhle u qedomo da hadome di şultonutho u du parlamento du Yawnan wu tewqido di otho Turkoyto bi mditho d’Thessaloniki. U rişwazire du Yawnan Kyriakos Mitsotakis’ste mawdacle ilo thnihuthayde mqabıl d’Turkiya u mırle; U mede dsim b’Stanbul latyo remzo du haylo, elo ithbat di dhıcfiye’yo.

Bebzabno, a mşale wu camo Yawnoyo kımdawım dmahwe hfuxyo mqabıl d’Turkiya wi wazirutho di baroyutho du athro mırla; U kenşo Emwothoyo du dorano da 21 fayış mdamro cala maqırhonwotho tawdithoye fanatik dıkmisomi adyawma b’Turkiya wu calathe klozım dmitahıt tedbire casye acla.