A neşe Yezidoye kımnaqın a foqucotho b’Şigur

A neşe da yezidoye dkıtne bi fnitho d’Şigur du Iraq kmahwın tacbo rabo laşan dırıkwi bu athrathe me hatho.

Bu insyatif dmıdla Hana xıd gurub d’Neşe Yezidoyotho bıthır mıd kmasılmi a nacimathe li madraşto kmandıfi a dukothathe ma foqucwotho dmahtilın a marıhbone dı Dacış bu zabno dıkbışwolın Şigur.

Hana dkıtyo cımra 27 ışne ksaymo rişonitho lu gurub  neşe dkul yawmo knıfqi ksaymi cuqobe laşan dımnaqın a foqucotho dmahti mu taraf da marıhbone dı Dacış dkıbışwolın i fnitho d’Şigur wu şalwo d’Ninwe du Iraq.

Bıthır mıd mharıwo i fnitho d’Şigur hul ucdo 1 sahmo ma arbco da yezidoye qadır docır la dukotheyde.

Hana kımmo ahna ksaymina u medano laşan dımamnina a dukotheydan inaqayo u dcoro du cameydan kibe howe tawtır u fşıttır.

Bu mamleyda Hana kımmo kul safro dıgnıfqono lu nqoyo da foqucotho kmahtono u mawteydi qımcayni elo naqqa hreto u athreydiyo mawxa klozım xıdmale, wa neşe dkıtne acmiste cayni ftakar kıtlın .

Hana mzawağtoyo u emo dı tlotho nacimeyo elo naqa hreto laşan i hubo di arceyda kmahto a hayeyda qurbono.