A protestowiye mqabıl d’Paşinyan kımdawmi

Bi erişkoyto d’Armenya b’Yerivan, kmimıd ucdo tedbire casye di mşaynutho, bu zabno dkımdawmi atagılyotho du protesto dıktılbi mu rişwazire Nikol Paşinyan dmıstacfe mi wolithayde.

Camgabıdathe, a’gabe saqıbloye d’Armenya mawdaclın dgıdmaqimi u ambargo dmahıt hedor du benyono du parlamento, b’şart dmsıtacfe Paşinyan mi wolithayde.

A’mtagılyone du protesto camonoyo b’Yerivan sxırlın athmıl u darbo du mazlo lu parlamento, u mahıtlın xaymotho qum du benyono u makadlın ste u talabththe dmıstacfe u rişwazire Nikol Paşinyan mi wolithayde. Adyawma ste a’mtagılyone mawdaclın dhadirene dfıthi a’darbone du parlamento, ida d’othe Paşinyan l’sidaye dmawdıc isticfayde udmisım huboye msarhıbe.

Hın ma qoyume uma maşle da gabe saqıbloye d’Armenya, mıştawtaflın la xaymotho dmarkıwi qum du parlamento d’Yerivan, makadlın dgımdawmi bi taklithaththe hul dmişarrıri a’talabaththe.

Bu zabno dkımdawmi a’protestawiye b’Yerivan, Paşinyan mawdacwole i şabtho dşaficina dhadiroyo dmisım guboye msarhıbe, b’şart dluwelın a’gabe saqıbloye mraşhe li wolitho d’rişwazire di şultonutho.

Bebzabno, Paşinyan mawdacle du rişono di mdabronutho du gayso Onek Gasparyan, adyawma gıdmitaqım mi wolithayde lfuth u fusqono di isticfa dmıdwo bhaq dide. Meqım mathe Gasparyan sımwole qroyto l’Paşinyan dmsıtacfe mi wolithayde, mawxaste Paşinyan huwole amro dmitaqım Gasparyan mi wolithayde. Elo u fusqono d’Paşinyan laşan dfoyıt la haye klzoım dmımde mu rişqutno Armen Sarkisyan.

A’protestawiye b’Yerivan mşrewolın ba tışerın dşaficina, bi netiçe du qyomo di şalyuthzayno zayno dımdewole Paşinyan camu athro d’Azerbejan calu qlimo d’Nagorno Qarabax. Lfuth u qyomano, Azerbejan qayıthla falqe rabe d’arcotho b’Qarabax.