A pwelıs d’Turkiya cabiri lu parlemento u msıklın u qoyumo du gabo d’HDP Ömer Faruk Gergerlioğlu

A pwelıs d’Turkiya cabiri lu parlemento u msıklın u qoyumo du gabo d’HDP Ömer Faruk Gergerlioğlu bi zoriye u mawfaqlın mu parlemento.

Elo bıthır ba şoce dbıthır me falge d’yawmo naqla hreto marfe u qoyumo Gergerlioğu. Cali sbuthathe d’HDP, u gabo da Yaroqe b’Urifiste frısle egartho u krıhle u qedomano d’Ankara.

Bıthır mu mamlo dsımle u rişono du gabo tuhmonoyo di MHP Devlet Bahceli adsafro, ba mowat d’powelıs Turkoye hçımlın calu parlemento b’Ankara u msıklın u qoyumo d’HDP bşıkıl dlıkmalıq li noşutho. Elo bıthır mu msokeyde ba şoce dbıthır me falge d’yawmo athi u tebo dmarfe hiro elo u bethdino dkito mqabıl dide gıdmdawım.

Gergerlioğlu dmidoste meqım kmo yawme i hasinuthayde, gıdmımsakwo baroyo bu nfoqayde mu parlamento u calathe sımwole protesto a fusqonani d’AKP cama qoyume hrene d’HDP dsımlın taklitho bıgawe du parlamento. Me gabo hreno kımdawi a hfuxye mqabıl du sxoro du gabo di HDP me şutose u mşale d’gabe mşahılfe; beynothaye u gabo DEWA, CHP, İyi Parti umu gabo Yaroqo d’Urifi.

U gabo Urifoyo mırle; Agzome du sxoro d’HDP, qatciyan lıkmitaqbıl u hano belhude zıttır gıdobe husrono li demoqratoyutho. A rişone dan athrawotho du Huyodo d’Urifi, klozım dmaydi u qedomano dkıtla Turkiya la qonune du athro, lu yawmoyo di ytawto dgıdowelın cal qariwo. Ankara latla zedqo dmıstacmılo a şutose di kinutho-mqabıl da folitiqore saqıbloye dımnaqın b’darbone demoqratoye. Bu athrano law fayış tbocofroso hiro u dişi a qonune di demoqratoyutho kulle.

U gabo Yaroqo d’Urifi mırle; Kısaymina qroyto li şultonutho d’Turkiya dımyaqro u pluralism da gabe uda hayle saqıbloye demoqratoye u kıtulbina dilonoyith, dmitarfın a hbişoye kulle dımsiki bi haraytathe me thome dlatne şroro. A esore d’Urifi cam Turkiya, klozım dhowın cala presibe di demoqratoyutho udu iqoro da standarde da qonune. Ahna kısundina i HDP wa gabe wa hayle demoqratoye kulle b’Turkiya.