A rişone d’Armenia mcayadlin u camaydan b’Ha Nison

U rişqutno d’Armenia Vahagn Khachaturyan mşadarle egartho d’tahınyotho lu camaydan u Othuroyo dıkhoye b’Armenia u dıkmcayıd i şato hathto d’Ha Nison. Bi egarthayde u rişqutno Armnoyo mırle; Kıtlan sabro du yawmano u basimo dıkmadıl calu hethotho du kyono, dhowe wasile lu şuşoto aminoyo lu camo Othuroyo.

U rişqutno mawdacle’ste bi egarthayde, di hawrutho dkito beyn dan Armınoye u Othuroye mahıtto’yo cal arcutho d’esore marduthoyo u makthabzabnoye dıkducri l’meqım mowat d’eşne. Adyawma u camo Othuroyo b’Armenia, kmıştawtıf ba haqle frişe da haye du athro u kımhafıd cali hiyoyuthayde ucali marduthayde.

Camgabe du rişqutno, u rişwazire Nikol Paşinyan’ste frısle egartho d’tahınyotho lu camaydan bu yawmo d’Ha Nison. Paşinyan dımşadarle i egarthathe la mathlone du camaydan b’Armenia mırle; Kıtolabno me lebi kule lu camo Othuroyo dıkhoye b’Armenia, Ha Nison dhowe brixo acle. U yawmano dkıtyo ha ma ceyode catiqe di noşutho, remzo’yo du hethotho u şuroyo d’şato hathto’yo. Calathe kıtulbina du cedano, dobe haye hathe, renye hathe u kuşore hathe.

Paşinyan mırle’ste; Kıtlan sabro kull şato duthyo, dmamtıyo şuşoto acma lu camo Othuroyo dıkhoye b’Armenia, u dlo belhude dımhafıd cali mardutho u calu leşonayde u emhoyo elo dımşawşatle’ste. Kıtulbina du cedano du Rbico dkıtyo di hubo uda burkotho dcoyış acmayxu ba eşne dothe u dcayşitu b’nihutho.