26/06/2021

A rişone d’tarte mdinotho d’Australia mıştawtaflın la qroyotho dsimi leşan i şultonutho dmawdıyo bu qtolğenso dan 1915

A rişone d’tarte mdinotho d’Australia, mıştawtaflın la qroyotho dsimi leşan i şultonutho du rişwazire, dmawdıyo bu qtolğenso dan 1915.

Ba maqırhonwotho dfrıslın a rişone da tarte karxwothani mamtelın lu bolo di şultonutho d’Camberra, du parlamento di marcitho d’New South Wales mawdewola bu qtolğenso dsımwo calan Armınoye, Suryoye Othuroye u Pontusoye.

I rişonitho di mdito d’Willoughby d’Australia Gail Giles Gidney wu rişono di mdito d’Ryde-Jerome Laxale, mıştawtaflın la qroyotho dsimi lu rişwazire Scott Morrison dmawde bu qtolğenso dsımwola i mamlaxtho da Cuthmanoye calan Armınoye ban 1915. Ba tarte mdinothani’ste kıhoye mınyono celoyo d’nubğe da sohude du qtolğensano dkıtte madraşyotho u citotho ebeye.

Gidney bi egarthayda m’akadla i klayto dkıtle u Mawtbo di mdito bi sbutho du qtolğensano u mawdacla, dıklozım i şultonutho’ste dmaydowa mathlo u parlamento d’New South Wales dmawdewole ebe ban 1997. I rişonitho di karxutho grışla’ste u zuhoro u mawdacla, bu qtolğensano lo belhude an Armınoye elo u camo Suryoyo Othuroyo u Pontusoye’ste mafıtwo bu qtolğensano dsımwola i mamlaxtho.

Gidney bi egarthayda, mbahasla’ste calu qrobo d’Qarabax wan Armınoye yasire dkito bidothe d’Azerbaijan. U rişono di mdito d’Ryde Jerome Laxale’ste sımle qroyto li şultonutho dmawdıyo bu qtolğenso dsımwo cala came Mşihoye u tlıble mu rişwazire dobe ulsoyutho li sbuthathe u dımcadır a camani bu şfoco di trawmathe. U Mawtbo di mditathe d’Ryde ba 2005 mawdewole bu qtolğenso u adşato’ste mahıtwole qoyumtho la Sohde du Sayfo.

New South Wales wa parlamentowiye du taymno d’Australia mawdelın bu Sayfo du camaydan, dan Armınoye uda Pontusoye ubi kampanya dsımwolın a 3 camani leşan i mawdyonutho bu Sayfo, snid u inisyatifano me hol 40 senatore u folitiqore frişe d’Australia u acmaye’ste ba casrowat d’tukose u şutose frişe; beynothaye u Mawtbo da Citotho, u Lobby da Kurdoye Kurdoye, u Mawtbo da Caraboye, u Federasyon da Yudoye b’Australia uğer.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…