A rişone du Cıraq mqadamlın a tahınyothathe lu camaydan u Othuroyo Kaldoyo Oromoyo Suryoyo bi cohnutho di rişe d’şato hathto d’Ha Nison-Akitu

CIRAQ – U rişqutno du Cıraq dr Abdullatif Jamal Raşid wu rişwazire du Cıraq al Sudani bi egartho dfrısle mırle; Bu zabno dıkmcaydina i şato hathto Bıbloyto d’Akitu, kımqadmina a tahınyothaydan u kıtulbina lu camaydan kule-dilonoyith lan ahunone u ahwothaydan an Othuroye Kaldoye Suryoye dıkmcadi u yawmano u catiqo dıkmasır u cumqo i mdinoyuthaydan wi catiruthaydan bi yortuthaydan i makthabzabnoyto.

Al Sudani mırle’ste; Cal du yawmano adşato kısodıf bu cedo du Fıtr, kıbcina’ste dım’akdina u timo di ciyeşe udi ahonutho dkito beyn came frişe du athraydan u rhimo dkobelan ruho hathto u haylo rabo. İ barmothoyuthathe’yo dıkmhaydolan tahte d’hdo otho b’sabro dmotina l’dactith bahuro xıd camo mhaydo u qawyo.Mu qlimo d’Kurdistan bu garbyo du Cıraq’ste, mqadım tahınyotho lu camaydan bi cohnutho d’Akitu.

U rişwazire Masrour Barzani wu rişono Neçirvan Barzani frıslın athmıl egrotho u mqadame a tahınyothathe a lebonoye lu camaydan u Kaldoyo Othuroyo Suryoyo bu qlimo d’Kurdistan, bu Cıraq u gawonoyith b’britho. Ba egrothani’ste a 2 rişone Kurdoye mahkelın cali şato hathto da 6775 d’Akitu bıgawe du makthabzabno u dıkm’adıl remzo d’haye hathe, huyodo u yortutho marduthoyto catıqto. A 2 rişone mırlın; Kıtlan sabro di şatathe i hathto dhuwyo mkono lu teqwiyo di hubo, du iqoro uda haye mşawtıfe dkıtne b’şlomo beyn da came dıkhoyın bu qlimo d’Kurdistan.

Me gabo hreno u rişono du Huyodo Athronoyo d’Kurdistan-PUK Bafel Jalal Talabani wu tahlufo du rişwazire du qlimo d’Kurdistan Qubad Talabani, mcayadlın u camaydan bu yawmo d’Ha Nison u mırlın; U camo Kaldoyo Othuroyo Suryoyo, ha ma came catiqe du qlimo, du Cıraq u dbritho’yo ubi cohnutho di rişe d’şato Bıbloyto Akitu, kımqadamno a tahınyothaydi a lebonoye lan ahunonaydan ula ahwothaydan u kıtolabnolın yawm malye fsihutho, şlomo u nihutho.