A şuşote haroye bi sbutho d’Nagorno Qarabax

U rişqutno d’Armenya Armen Sarkisyan, maqımle falgıd da wazire di şultonutho d’Yerivan ma woliyothathe, bi netije du hboso dıkmisım cali şultonutho bıthır mdımdela u qyomo di şalyuthzayno du qlimo d’Nagorno Qarabax.

 Mxasra hreto, Azerbaijan mawdacla da haylawothayde cabiri l’fnitho hathto bıthır mdıgrişi mena ahaylawotho Armınoye hedor du qlimo d’Qarabax.

 Calu talab dhawile u rişwazire d’Armenya Nikol Paşinyan, u rişqutno Armen Sarkisyan maqımle ışto ma 12 wazire dkımşakli i şultonutho ma woliyothaththe, baynothaye kito awazire di baroyutho, du sutoro, di mdabronutho qşitho, du fulhono u du yulfono.

Lfuth hın ma mşale folhoye d’Armenya, i isticfa du waziro du sutoro Deved Tonoyan athyo luhwoyo bi netije du hboso dıksaymile agabe saqıbloye cal Paşinyan dlıkobıc fayış dmıgrış u zuhoro calu husrono dhawi b’Qarabax.

Megabo hreno, i wazirutho du sutoro d’Azerbejan mawdacla du gaysayda cabır adyawma li fnitho d’Kalbajar dkıtyo i fnitho trayonitho dıkmıgroşi mena ahaylawotho Armınoye bu taro du qyomo di şalyuthzayno d’Qarabax. Amşale Azerbaijanoye mawdaclın du groşo da haylawotho d’Armenya mi fnitho d’Kalbajar dıkmıntarwo dhowewo 15 bu yarhano, mşawhır hul adyawma mi celtho du muzoğo lo towo dkito bu darbo dıkmasır Kalbajar camu athro d’Armenya. Lfuth u qyomo di şalyuthzayno dhawiwo bi mescoyutho d’Rusya, Armenya klozım dmıgroşo mhın fenyotho dıknıfli larwal da thume du qlimo d’Qarabax. Bi şabtho dşaficina armenya maslamwola i fnitho qamayto d’Ağdam la haylawotho d’Azerbaijan.

Mxasra hreto, u rişqutno d’Rusya Vilademir Putin hawile esore bu darbo du talafon camu rişwazire Nikol Paşinyan ucamu rişono d’Azerbaijan İlham Caliyev. Lfuth u buyono dıfrısle u Kremlen, Putin drışle cama tre rişone i aykanoyutho d’Qarabax bu taro du froso da haylawotho Rusoye dıknıfqi moro lu şlomo b’gawıd du qlimo, i mcadronutho noşoyto da comure d’Qarabax, wi sdirutho bu haqlo momunoyo, u ftoho dı darbone du mazlo u mathyo.

Camgabıdathe, Nafıq mwatyutho beyn Ankara u Msoko, calu talab dhawila Turkiya dmarkıwo nuqazto şritho b’Qarabax. 10 bu yarhano mıtafqowa Turkiya u Rusya dmarkıwi qentrun mşawtıfo bu qlimano leşan u tehqobo di şalyuthzayno beyn da hayle d’Azerbaijan u dı Armenia. Turkiyaste kubco ucdo dmarkıwo nuqazto d’ruha, elo Rusya lo maqbela u talabano.