A şuşote haroye bu athro d’Suriya

A Mharbone da came du garbyo udu madınho d’Suriya, msıklın krılto hreto da marhıbone d’Dacış dımtaybowa ruha dsaymo hçomo bu qlimo d’Deyr Ezzor.

Bebzabno konvoy folhoyo d’Amerikia sımle dawriya hedor i mdito d’Derik, leşan u duyoqo di mşaynutho di fnitho.

Lfuth i maqırhonutho dhuwlın a Haylawotho d’Suriya Demoqratoyto, bıthır mıd matilın mawdconutho ğnızto ma comure di mdito d’Şibel bu qlimo d’Deyr Ezzor, sımlın athmıl cuqobo cal hdo ma krılyotho da ğrobe marhıbone d’Dacış dıkmtaybowa ruha dsaymo hçomo qtolnafşoyo.

Bi mawdconuthathe dfrıslın a hayle d’QASAD mawdaclın, dımsıklın 2 marhıbone u darıxto du motor wa foqucotho dkıtwın acmaye. Lfuth u plan da marhıbone, gıdmisamwo furqoco qaşyo beyn da mdinoye. Me gabo hreno u koalisyon Emwothoyo, kımdawım a cuqobayde bu garbyo ubu madınho d’Suriya. Athmıl konvoy da folhe Amerikoye sımle dawriya hedor d’Derik leşan u duyoqo di mşaynutho di mdito.

Bu konvoyano dkıtwo 4 radoyotho folhoye d’Amerika azza li qritho d’Cayn Diwar bu garbyo d’Derik. Meqım şabtho’ste, sımwolın a folhoye Amerikoye 3 dawriyat b’Derik.Camgabedathe, bu zabnano dımqarawlın a guboye di rişonutho d’Suriya, a hçome wa taxtuşe kımdawmi b’dukotho frişe du athro.

Bu qlimo d’Darca-dkıtne a comurayde saqıbloye la guboyani, sim hçomo ubi netiçe qtil u mçarıh mınyono d’comure. B’İdlıb’ste nafıq taxtuşe beyn da hayle du rejim d’al Asad uda marhıbone d’Fateh al Mubin-dkıtyo u Gbino d’al Nusra acmaye. A taxtuşani, mbarbızi bıthır l’dukotho frişe d’Hama udi Latqiye’ste. Al Nusra mdacele, dqtil u mçarıh mınyono ma hayle du rejim qariwo l’Jabal al Akrad bu garbyo di Latqiye.