A şuşote haroye bu qrobo d’Armenya u d’Azerbaijan

Arişone da citotho mşahılfotho d’Urışlem bi qroyto dsımlın, b’surhobo tlıblın dmitakle u qrobo bayn d’Armenya u Azerbaijan bu qlimo d’Nagorno Qarabax.

 Bebzabno, u dawqo da dyoşe da zedqe noşoye d’Qarabax, frısle istatistik calu menyono da debhe mdinoye wi kmoyutho du husrono dhawyo bi netije du qrobo dımşarewole 27 bu yarho d’İlıl dşaficina.

 Afatıryarxe wa rişone da citotho mşahılfotho d’Urışlem, bu buyono dıfrıslın b’surhobo tlıblın dmitakle u qrobo wu shofo bayn Armenya u Azerbaijan bu qlimo d’Nagorno Qarabax bi methcadronutho da hayle rabe dı britho.

Bu buyonathe, arişone da citotho d’Urışlem mırlın “ataxtuşe folhoye kowın celtho lu qatlo da mdinoye dlatlın htitho u lu tehzimo da gabre, neşe, nacime u sobe lığer fenyotho. Ktılbina ma rişone d’Urifi u ma tıre rişone d’Rusya u d’Amerika u mu notarrozo gawonoyo d’Emwotho Mhaydotho dşıfci b’surhobo li harake, bnişo dmitaklın ataxtuşe u dmitabdın abazare du şlomo aminoyo”.

Megabo hreno, u rişwazire d’Armenya Nikol Paşinyan bi socurutho dsımle athmıl cam taşdarto d’noture lu qlimo d’Qarabax, laqi i mdabronutho folhoyto du qlimo u drışle acma aşuşote haroye du qrobo mqabıl d’Azerbaijan. Paşinyan bi maqıblonutho dsımle acme u ajans d’Frans Press, mawdacle du qrobo d’Qarabax athi luhwoyo bi netije du snodo dıhula Turkiya l’Azerbaijan, u makadleste du mede dkowe ucdo b’Qarabax qrobo marıhbonoyo mqabıl d’camo dkobe ağuno laşan i hiruthayde. Paşinyan mırleste “ida d’Urifi lıqıdro dsaymo mede bi sbuthathe, i naqlayo klozım dnıtro dhızyo ahaylawotho Turkoye qariwo mi mditho d’Viyana awkith grışle u zuhoro cala Cuthmanoye dıkbışwolın u athro d’Austurya bu doro da’17”. Elo bebzabno, Paşinyan mahwele dkıtle tuxlono b’Rusya dgımcadro Armenya ida dmisım hjomo baroyo b’gawıd da narcothayda lfuth u qyomo folhoyo dımde bayn da tıre athrawotho.

Mxasra hreto, u mcadrono du rişono du parlamento d’Urifi Fabyo Castaldo, mzaharle mu qento du qedomo dı Turkiya bi fnitho d’Qafqazya, u mawdacle du qrobo d’Qarabax kibe dmişahlıf mı qrobo dkıtyo bayn dı tre athrawotho lı qrobo qlimoyo.

Camgabıdathe, Azerbaijan thımla ahaylawotho d’Armenya bu hjomo cal falqo mu xtuto du ğaz dkıtyo bayn Bako Teblisi u Jihan, u mawdacla da xtutani kıtlın ulsoyutho rabtho li mşaynutho du enerji d’Urifi. Elo i şultonutho d’Yerivan baroyo bi maqırhonutho dhula, rfıdla athomani dkıtne abatile, u mırla “mu şuroyo mawdacwolan da dukotho stratiji uvdu enerji latne u nişaydan”.

Megabo hreno, u dawqo dkımcaqıb adyoşe bhaq da zedqe noşoye b’Qarabax, mawdacle dımgalwele ba casrowat olufe neşe u sobe u nacime mu qlimo li erişkoyto d’Yerivan u lığer mdinotho. Lfuth u statistik dıfrısle u dawqo, ba 11 yawme dşafıc calu qrobano, qtil 19 mdinoye baynothaye 7 neşe u hıdo nacımto u 11 gabre, mjarıhste 60 mdinoye baynothaye 12 neşe, hjim cal zıd me 60 kunoşe dı bote, u cal zıd me 2100 bote dilonoye u dukane di tagorutho. U bebzabno hjim cal zıd m’240 radoyotho u hedor 350 macımle.