A şutose d’MUB b’Turkiya cami iqartho di Sohıdto İzla Neriman, maqımlen caza bu salon di cito d’Mor Barsawmo bi mdito d’Mıdyad b’Turabdin

MIDYAD, TURABDIN – Athmıl bu salon di cito d’Mor Barsawmo dkıtyo bi mdito d’Mıdyad, mtayıb caza li hadımto di Sictho di Rişonutho du Mawtbo Umthoyo d’Bethnahrin-Sohıdto İzla Neriman Özgun Rucyo, dgımınqıl adyawma u fağrayda li mdito d’mawlıdo eba, leşan dmitahwıyo lu cafro ba bethqbure di dayro d’Mor Abrohom.

A hadome da şutose d’MUB b’Turkiya-u Federasyon da Hudre Suryoye wu Hudro da Neşe Suryoye, mtayablın u cazano cami iqartho di Sohıdto İzla leşan dmahwın u iqorathe, dmathkıri u cuhdonayda, i şaxsiyayda, a fulhone dmaşela b’haqle frişe wu falqe mşahlıfe du athraydan Bethnahrin ubi golutho. Bu caza dsim athmıl, hadır’ste i mcalyutho du hasyo di marcitho Mor Tematheos Şmuel Aktaş u kohne hrene du qlimo wu maqım teşmışto cali ruho di Sohıdto. 

Wu hadomo di Sictho di Rişonutho d’MUB Suphi Aksoy sımle mamlo la hadire calu ağono umthoyo d’MUB dkıtyo ağono da Sohde dbıhlın a hayathe leşan u camo ulu athrathe. Camgabathe mahke cala haye di Sohıdto İzla dkull naqla obowa mrodo lu teqwiyo du sebyono di athto, leşan i şawyutho beyn da ğense.

Bu zawhano’ste hadırwo abuna qaşişo Şamcun Kurt mi mdito d’Worms d’Almanya mamlayde kali cali mıcne di Sohdutho ucalu ağono dkobın a hadome d’MUB li hirutho du camathe udu camo’ste bebzabno, dnofıq moro lu tacbo dkobın. U zawho du cufoyo di Sohıdto b’Mıdyad bu şıkılano gıdhowe;

Camgabe du caza d’athmıl, adyawma’ste gıdmitıw bi cito d’Mor Barsawmo mi  

şoctho di 13:00 hula 21:00. 15 bu yarho’ste dkıtyo yawme Şabtho gıdmisım u cufoyo bi şoctho di 13:30 bi Dayro d’Mor Abrohum u Mor Hobel b’Midyad, u bıthır gıdmıstaqbılo i iqartho wa hadome d’MUB a buyoye du camo bu salon di dayro. 16 bu yarhano’ste yawme Huşabo bıthır mi slutho, gıdmitiw mi şoctho da 12:00 hola 21:00 du lalyo.