A tagliyotho b’Amerika kımdawmi b’Wisconson

Bi mditho d’Kinoşa bu qlimo d’Wiskonson b’Amerika, hawi şğuşye u taxtuşe qaşye bıthır mdıqtilın a pwelıs farsufo hreno komo.

Bi netije dqaşın ataxtuşani, u rişono Amerikoyo Donald Trump tlıble dmıfrıs noture athronoye laşan dımamni i mşaynutho bu qlimo d’Wiskonson.

Meyawme d’huşabo uhul ucdo, aşğuşye wa protestawiye dımşarelın mditho d’Kinoşa bu qlimo d’Wiskonson b’Amerika, mşahılfi bıthır l’taxtuşe mzayne bayn da pwelıs wa mtagılyone dıtcınlın zayne bidothaye.

Ataxtuşani athın luhwoyo bıthır mıdmarıswolın apuwelıs d’Wiskonson buğre calu farsufo komo dışme Jikob Blik dcımre 29 ışne. Lfuth u vidio dıfriswo yawme d’huşabo dşaficina ba dafe kenşoye, apwelıs Amerikoye marıswolın buğre cal hasıd d’Blik bu zabno dmarhaqwole menaye u dıftıhwole u tarco di radaytayde dkıtwo b’gawa atlotho nacimayde.

İ iqartho d’Blik wa sniğrayde bi maqırhonutho dhulın lu tboco froso, mawdaclın da pwelıs trelın Blik dloqe i haraytayde.

İ sferyawmo d’Newyork Tayms, bi mawdconutho dıfrısla mathkarla dı tlotho farsufe mjarhi ba taxtuşe haroye dhawın bi mditho d’Kinoşa, baynothaye kito ha i aykanoyuthayde bu qentoyo.

Bu vidio dıfris athmıl blalyo, kmahwe dnafiq taxtuşe bayn da mdinoye baynothaye ha dqayıthle buğro b’katfe u hreno dımjid cali yarco.

Bebzabno, a’puwelıs marıslın buğre dlatne qatole cala mtagılyone u mhalaqlınste foqucwotho dıkmaxiri damce. Ubu mqabıl a’mdinoye mhelın ba puwelıs kefe, şotıfyotho u foqucwotho di hawa.

Cali sbutho da şğuşayni dkımdawmi, u rişono d’Amerika Donald Trump tlıble dmıfrıs noture athronoye udmitarkıwo i şalyutho bi mditho d’Kinoşa bu qlimo d’Wiskonson. Trump bi maqırhonutho dıfrısle bi dafayde du Twiter mırle “u rişono du qlimo klozım dforıs noture athronoye. Ahaylawothaydan hadirene u kibın dmarkıwi i mşaynutho. Klozım u qetrano dıtoyım b’surhobo”.