A tagliyotho mqabıl du rişqutno d’Belarus qaşın

Bu zabno da tagliyotho qaşın b’Belarus awkith b’Rusya i Hewarto, mqabıl du rişqutno sımle Alexander Lukashenko baroyo telefon lu rişono d’Rusya Vlademir Putin.

 Lukashenko sımle i rişonutho d’Belarus mi şato dan 1994 wu rişqutno ihidoyo dhawila Belarusyo u ğalabe athrawotho Urifoyeste kımfaşqile xıd diktatör.

U rişqutno d’Belarus Alexander Lukashenko, hawile mamlo bu telefon camu rişono d’Rusya Vlademir Putin u drışlın camhıdode i aykanoyutho harayto d’Belarus. U rişqutno Lukashenko mahkele l’Putin, dhayle nuxroye kımdaxli ba sebwotho gawoye du athro u Rusyaste, bu qentoyo.

Bıthır ma guboye di rişqutnutho dsimiwo b’Belarus ba yawmotho dı şafıcina, mıdwole Lukashenko 80.23 ba mo da qole wi saqıbloyto rişoyto Svetlana mıdwola belhude 9.9 ba mo da qole. Bu şıkılano Lukashenko mnaqewo da 6 naqlat li rişqutnutho du athro. Awkith Lukashenko sımle i rişonutho d’Belarus mi şato dan 1994 wu rişqutno ihidoyo dhawila Belarusyo.

Bıthır ma guboyani, jbirowa Svetlana dmahzımo l’Lithuania, msıkwo u gawrayda wu sımwola qroyto dmisım tagliyotho mşayne mqabıl du rişqutno. U calathe atagliyotho kımdawmi bı mdinotho frişe mqabıl d’Lukashenko dıkmıthım dsımle hile ba guboyani. Cala tagliyothaniste fris tebe, da mtagliyone kmitafiti ba taşniqe, qtil mınyono wu msik ban alfayo dıhrene. I aykanoyuthatheste grışwola u zuhoro tukoso d’Amnesty.

Bu mamlo dhawile Lukashenko camu baramnayde d’Rusya Vlademir Putin, a 2 gabe makadlın dkıtte tuxlono da qetrani camu zabno gıdmışroyi, elo u mede ulsoyo dkulle di aykanoyuthathe dlo mitıstacmılo me ğer hayle dkiba dobo husrono lu athroyo. U rişqutno d’Belarus rfıdleste i mescoyutho dğer athrawotho; beynothaye d’Polonia u mawdacle dlayt sniqutho lhawxa mede.