A taxtuşe beyn Armenya u Azerbaijan bu tboco froso dı brithone

İ sbutho da taxtuşe beyn Armenia u Azerbaijan calu qlimo d’Nagorno Qarabax, kımdawmo dı gurşo u zuhoro du tboco froso Emwothoyo.

 Ba tebe haroye dıfrisi calu qrobano, mawdıc d’Azerbaijan mhela adyawma naqla hreto bi arişkoyto d’Qarabax, u Armeniaste huwla funoyo qaşyo la hjomani. A taxtuşe dhawın bi şabthatheste, kmifaşqi a taxtuşe qaşye dnafiqi beynothaye mi şato dan 1994 u hol ucdo.

 Yawme d’Huşabo dı şafıcina, mşarewolın a taxtuşe beyn du gayso d’Armenia u d’Azerbaijan calu qlimo şaryo d’Nagorno Qarabax, dkıtyo i sagiyoyutho da comurayde Armınoye elo ba thume d’Azerbaijan. Hani şabtho kamılto, kımdawmi a taxtuşani beyn da 2 athrawotho wa hayle Emwothoyoste kıtulbi dmisım şalyuthzayno u dminase bu darbo du dialog, dmışre u krizano.

Elo adyawma safrayto, şmic naqla hreto u qolo da furqoce bi arişkoyto du qlimo d’Nagorno Qarabax Stepanakert, wi mdabronutho mawdacla dmıdlın tedbire casye mqabıl da hjomani dsimi aclaye ma hayle d’Azerbaijan. Elo lfuth Azerbaijanste, Armenia bı qaşyutho mhela bi mditho trayonitho rabtho du athro Gjandzja u sim qroyto lu camo dtore ma botayde.

Athmılste mıstacmewola Azerbaijan haylo rabo mqabıl du gayso d’Armenia u mıstacmalwo zayne yaqure b’Qarabax. Calathe u rişwazire d’Armenia Nikol Paşinyan mawdacle l’Al Jazeera, du grub d’Minsk bu tukoso Emwothoyo di mşaynutho u di methcadronutho b’Urifi, kdurşi ucdo amkone dmişadır hayle di mşaynutho d’Rusya l’Qarabax.

Bu zabno d’Rusya, Amerika u Fransa kubci şalyuthzayno bu qlimano, Turkiya dıkımşadro marhıbone me Libya u Suriya l’Azerbaijan mdacela, d’Armeniayo dıkubşo u qlimo u klozım dmıgroşo. Azerbaijan mdacelaste d’Armınoye me Suriya, Lebnon, Rusya, Georgia, Yawnan, u ma İmarat Caraboye mşadri la gbine du qrobo leşan dımharbi mqabıl dida.

İ wazirutho du sutoro d’Armenia mawdacla, dıqtilın hol 2.300 marhıbone d’Azerbaijan, mu zabno dımşarele u qrobano u dkıtne hadire dmaydi kul şıkıl d’tedbire, leşan u duyoqo di mşaynutho dan Armınoye dkıtne b’Qarabax. A hayle da 2 gabeste, mfarqaclın ba mowat d’radoyotho u tankat folhoye dıhdode. Azerbaijan mawdacla d’19 mdinoye qtili ba hjomani, elo lo mawdacla u mınyono da folhe dı qtili. B’Qarabax qtil 11 mdinoye wu 51 folhe wu 2 folhe b’Armenia.