A yaqrotho d’Beyrut tlıblın dmisım sictho şritho la buhone du furqoco

Ayaqrotho da dıbhe da furqoce qaşye dhawın bi arişkoyto d’Lebnon Beyrut, tlıblın mu Mawtbo di Mşaynutho d’Emwotho Mhaydotho dmabde buhono calu qtolcamano dsim bu athro.

 A yaqrotho da dıbhe, tlıbe dmibayın sictho ma istixbarat d’Amerika FBİ dmaydo ramhıl duktho ba buhone dıgmisomi cala furqocani dhawınwo 4 bu yarhano bı camber du lmino d’Beyrut.

 A 2 furqoce dhawınwo celtho lu qatlo d’170 farsufe u ban alfayo dmijarhi bu lmino d’Beyrut d’Lebnon, klozım dmitahti bu taro du qtolcamo. A furqocani, trewolınste husrono rabo bi arişkoyto u ban alfayo dıbnaynoşo fayışi dlo bote.

A yaqrotho da dıbhe da furqocani tlıblın mu Mawtbo di Mşaynutho d’Emwotho Mhaydotho dımbayın sictho ma istixbarat d’Amerika FBİ, dmaydo ramhıl duktho ba buhone dgımitabdın cala furqocani dhawınwo 4 bu yarhano b’cambar du lmino d’Beyrut me 2.750 tonat d’amunium nitrat.

Cal ışme da yaqrotho dban alfayo ma dıbhe da furqocani d’Beyrut, i sniğarto Nada Abdelsatter qrela i maqırhonutho da yaqrothani la hadome du Mawtbo di Mşaynutho u mırla; A yaqrotho da dıbhe late tuxlono bu sistem folitiqoyo u di mşaynutho b’Lebnon u ktuhmi u sistemano bu qtolcamo dsim walaw latwe u athro lhude bi sbuthathe.

İ sniğarto dımşadarlaste kopia ma talabani la rişayizgadwotho dan athrawotho hadome du Mawtbo di Mşaynutho mırlaste; U darbo qonunoyo ihidioyo leşan dmisım buhono u dmimıd fusqono Emwothoyo, du Mawtbo di Mşaynutho dımşadır sictho şritho l’Lebnon leşan dımqadmo u hawbano lu bethdino Emwothoyo d’Den Haag yaste dımşaklo bethdino dilonoyo dımcaqıb u hawbano.

Cala furqocani d’Beyrut, mathlone nuxroye frişe sımlın adyawma socurwotho l’Lebnon; beynothaye u mcadrono du waziro di baroyutho d’Amerika David Hale, u waziro di baroyutho du İran Javad Zarif, i wazırto dcala hayle folhoye d’Fransa Florence Parly uğer. Amathlone nuxroye, laqın mşale Lebnonoye frişe.