A Yezidoye du Daşto d’Ninwe mahıtlın slibe cala bote da mşihoye

A Yezidoye dıkcayşi bi qastra d’Bacşiqa u d’Bahzani bi daşto d’Ninwe, mahıtlın slibe dıkmabıhri cala bote du camaydan dımgalwelın ma dukothani bıthır ma hjome dsımwole u tukoso marıhbono dı Dacış i şato da 2014 cali daşto d’Ninwe.

 Ba maqıblonwotho dsimi cam hın Yezidoye, mawdaclın di dawsathe kmadilo cala nesore qawye di ahonutho dkito bayn da Yezidoye u du camaydan, u tlıblın ma yaqrotho du camaydan dımgalwelın ma dukothani dıdıcri me hatho la botathe.

Bi cohnutho du duxrono du cedo mqadşo du slibo, a clayme Yezidoye dıkhoyın bi qastra d’Bacşiqa u d’Bahzani bi daşto d’Ninwe, hani da tloth ışne kmahti slibe cam bahre cala bote da galwoye du camaydan dkıtne aşbobathe xıd dawse dıkmadilo calu cımqo da nesore dkito bayn da Yezidoye wu camaydan bu garbiyo du Iraq. A Yezidoye tlıblınste mu camaydan dımgalwele mi Bacşiqa umı Bahzani dıdıcri naqla hreto la botathe.

Ba maqıblonwotho dsimi cam hın hfite Yezidoye, mawdaclın dı claymo Yezidoye bi qastra d’Bahzani mahıtle tlotho slibe cala nıgore dı tlotho bote da şbobayde a Mşihoye bi cohnutho du cedo du slibo mqadşo. Ahfite Yezidoye mawdaclınste du qedomano latyo mede hatho dıkmisım, elo kıtle şerşe makthabzabnoye dıkmadili cali hubo, calu şbuqyo u cali ciyeşe mşayanto dkıtwo bayn da nabohotho du camaydan u da Yezidoye.

Bebzabno, hfite hrene Yezidoye ba maqıblonwotho dsimi acmaye, mahwelın sabro dıdıcri ayaqrotho galwoye du camaydan naqla hreto lu athrathe, u dmıştawtıfi camıhdode ba gedşe mafıshone u mahişone. A Yezidoye d’Bacşiqa kmawdıciste da bote du camaydan heş kmabıhri ba slibathe, u ktılbi du camaydan dıdocır cal qariwo la botayde dilonoyith bıthır mıdrakiwo i mşaynutho ba dukothani.

Anesore dkito bayn du camaydan wa Yezidoye bu garbiyo du Iraq u bi daşto d’Ninwe, kımgaşmi i mardutho di ciyeşe mşayanto di ahonutho dıklozım dmimodo mathlo la came umthoye u tawdithoye hrene du Iraq.