Athmil b’zawho ruhonoyo u camonoyo rabo, simo i slutho du cufoyo di sohıdto du MUB İzla Neriman Özgun Rucyo

SODERTALJE, Swed – Athmil bi şuctho da 11 dsafrayto, simo i slutho du cufoyo di sohıdto İzla bi cito d’Mor Yacqub Dansibin bi mditho d’Södertalje du Swed. U zawho du cufoyo mrayşın ma tre hsayo di marcitho du Swed Mor Yuhanon Lahdo u Mor Diyosqoros Bınyamen Ataş bi methcadronutho dı dayroyo Afrem, xuroyo Ayyub, xuroyo Yusıf, xuroyo Nıcman u qaşişo Malke Cışşo. 

Lu zawhano mıştawtafle mathlone d’gabe u şutose du camaydan u Suryoyo Othuroyo Kaldoyo Orumoyo, baynothaye a’tre rişone zawgoye du Huyodo Suroyo d’Urifi ESU Fahmi Vergili u Manuwella Demir. 

U fağro di sohıdto İzla tcin cala katfotho u macbır b’zawho li cito d’Mor Yacqub Dansibin.  

İ tahrazto du zawhano dsim b’gawıd di cito, mqadmola hawro Şamiram Majida dkıtyo i hotho di sohıdto İzla. Bışmıd du Mawtbo Umthoyo d’Bethnahrin d’MUB Rima Abrohom sımla mamlo. Bıthır mathe, u bartho di sohıdto İzla Helen Zifker bu mamlo reğşonoyo dsımla, mahkela cali sohıdto İzla xıd emo dhawila tacbo acma, ubebzabno mqadamla tawdiyotho li hawro Filis Rucyo dhawyola emo hreto bu zabno dıfrişo i emayda sohıdto İzla lu fulhono umthoyo d’MUB. 

Camgabıdathe, qrın bi cito an’egrotho da buyoye dımşadri ma gabe u şutose du camaydan, baynothaye u qentrun da Mşihoye du madınho mescoyo d’Almanya, u şutoso di mcadronutho da Rum Ortodoksoye d’Samandağ dı Turkiya, u Huyodo Suryoyo d’Almanya, a’tre marciyotho du Swed ud’İsknadinavia, u Huyodo Orumoyo Tibeloyo, i mtakasto Othuroyto Demoqratoyto ADO, u Zawco Demoqratoyo Othuroyo, u gabo d’Bethnahrin Demoqratoyo du Ciraq, u gabo du Huyodo d’Bethnahrin Athroyo du Ciraq HBA, u gabo du Huyodo Suryoyo d’Suriya GHS, u hudro marduthoyo d’Bethqustan, u Huyodo da Neşe Othuroye du Swed, i knuşto da Neşe d’Hovşo d’Södertalje, sniğro İlhan Aydin wu qoyumo bu parlamento du Swed Yusıf Aydin. 

Bu zawho dsim b’gawıd di cito ste, omuro George Şamcun qrele mimro mahişono, u Fadi Başir nqışle calu Vyul. 

Bıthır mathe, mtayıb hfitutho d’buyoye laşan du duxrono di sohdıto İzla bu salon di cito d’Mor Yacqub Dansibin b’Södertalje dhadırla hul 300 farsufe. Bi hfituthathe omuro George Şamcun qrele mimro hreno, u amnoro Musa Alyas mqadamle zmirto cali mıcne du yawmoyo. Ubebzabno fris sinivisyon cala haye di sohıdto İzla.

Hasyo Bınyamen Ataş bu mamlo dsımle bi hfituthathe, kali cali mıcne ucali ulsoyutho d’8 Odor laşan di hawro İzla xıd athto ağunisto dhula tacbo laşan di sbutho umthoyto du camaydan.