11/01/2021

Adyoşe da zedqe noşoye dıkmisomi b’Suriya ba fınyotho d’Turkiyane

İ mşatasto d’Suriya da zedqe noşoye, mıthabatla hul 100 dyoşe bhaq da hfite uda gelyunore, u zıd m’15 nesyune u hjome du qatlo dhawın ba fenyotho d’Suriya i şato da 2020.

 Lfuth i mşatasto d’Suriya, a gunhe du qatlo wa dyoşani bu zyudo dkulle simi ba fenyotho dkıtne bi morutho du athro kaboşo dı Turkiya.

 İ mşatasto d’Suriya da zedqe noşoye bu taşroro dıfrısla lu tboco froso, mthabatla adyoşe wa gunhe dsimi mqabıl da hfite u da gelyunore d’Suriya bi şato da 2020, u mawdacla da qayde dmahti cala hfite u gelyunore, u msokaththe wa buqore dıkmisomi acmaye kımdawmi ba fenyotho du rejim d’Suriya, uba fenyotho dkıtne bi morutho di şultonutho du furqono awkith ba fenyotho d’İdlıb u hedor d’Hlob dkıtne bi morutho da çatawiye dıkmısnodi m’Turkiya.

Lfuth i mşatasto d’Suriya, zıd m’98 dyoşe, htofe, msoke u tehdide simi i şato da 2020 bhaq da hfite u gelyunore ba fenyotho mşahılfe d’Suriya, baynothaye hedor d’69 dyoşe simi ba fenyotho dkıtne bi morutho du grub marıhbono dı Tahrir Alşam wa grube hrene çatawiye dıkmısnodi m’Turkiya, ukito ste zıd m’25 dyoşe simi ba fenyotho du rejim d’Suriya.

Xıd mathle, i mşatasto d’Suriya da zedqe noşoye mathkarla da haylawotho di mşaynutho du rejim, msıkwolın bu yarho d’İlıl dşaficina u gelyunoro Kinan Waqqaf u mahıtwolın bu hbuşyo di mditho dı Tartus, cal dsımwole sturyo i aykanoyutho du kahrobo di mditho. Ubu yarho d’Ob dşaficina, a’marıhbone du grub dı Tahrir Alşam awkith du gbino d’Alnusra dmeqım, msıkwolın u gelyunoro Amerikoyo Daril Filips, cal dsımwole maqıblonitho cam athto d’farsufo Britanoyo dıthımwola u grub dı Tahrir Alşam bu msoko du bethzawgayda bi qastra d’Atama bu garbiyo d’İdlıb, udsımwo teşniqo bhaq dide.

Camgabıdathe, i mşatasto d’Suriya mthabatla hedor d’15 nesyune u hçome du qatlo i şato da 2020, bi sagiyuthaththe simi b’İdlıb uba qıryawotho d’hedora uba fenyotho hrene da çatawiye dı Turkiya. Ubi netiçe da hçomani qtılwo hamşo hfite u mçarahwo hrene.

U mede dkıtyo makhıxono, athmıl dkıtwe u duxrono da gelyunore falohe dı Turkiya, u mşalo du tboco froso di rişonutho dı Turkiya Faxır Aldin Altun, mawdacle di hirutho du tboco froso b’Turkiya mhaqaqla dawsat mşawşıte dıkgırşi u zuhoro bu zabno di şultonutho d’AKP d’Erdoğan, elo lfuth u taşroro di gelyunorutho tibeloyto, Turkiya dkıtwa bu darğo da 99 bi şato da 2002, bi şato dşaficina nafilo lu darğo da 154 mbayn d’180 athrawotho bi sbutho di hirutho du tboco froso, awkith Turkiya daciro 55 darğe laxalf bu zabno di şultonutho d’AKP.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…