Ağonisto ma Haylawotho d’Suriya Demoqratoyto nafıl Sohdo u tlotho hrene mçarhi, bu hçomo dsımle Dacış aclaye b’Dayro Zcuro (Deyr Ezzor)

DAYRO ZCURO (DEYR EZZOR) – Ba zabne haroyani dkito xalyutho bu garbyo d’Suriya, sımla athmıl krılto d’Dacış hçomo cali radoyto da hayle d’QASAD bu qlimo d’Dayro Zcuro. Bu hçomano u barbroyo dsımle Dacış, nafıl Mharbono d’QASAD Sohdo u 3 hrene mçarhi. Elo a Mharbone’ste baroyo mfanelın u hçomano u nafıq taxtuşe qaşye mqabıl Dacış.

U hçomano d’Dacış hawi b’Abu Hamam dıknuflo 45 kilometre ma thume du Cıraq ubi maqırhonutho dhuwle QASAD huwle şudoyo, dgıdobe funoyo qaşyo l’Dacış calu hçomano dsim cala Mharbonayde u cal dıkmahrıwi i mşaynutho du qlimo.

Lfuth i Mşatasto da zedqe noşoye d’Suriya, mu şuroyo di şatathe uholucdo sımle Dacış 84 hçome bu garbay madınho d’Suriya u qtil u mçarıh mınyono d’Mharbone u mdinoye. Me gabo hreno i Mşatasto mawdacla’ste, da hayle du koalisyon Emwothoyo bıdelın dımhaydri ruhaye dmaxlın nuqazto du duyoqo b’Al Comar u hreto dkıtyo ban arcotho du ğaz d’Koniko.