Ahaylawotho di HPG qtilın 8 folhe Turkoye

Tmınyo folhe mu gayso kaboşo dı Turkiya qtili b’şişaltho d’cuqobe dsımlın ahaylawotho di mudafaca camonoyto di HPG bi fnitho d’Beyazid b’Turkiya.

Camgabıdathe, hıdo mharbonitho di HPG qtilo bu hjomo oyaroyo dsımle u gayso kaboşo dı Turkiya bi fnitho d’Zab.

U qentrun du tboco froso da haylawotho du sutoro camonoyo di HPG dkımmathli u gefo folhoyo du gabo di PKK, frıslın buyono lu tboco froso cala cuqobe haroye dsımlın b’fenyotho mşahılfe mqabıl du gayso Turkoyo.

Lfuth u buyono, ahaylawotho di HPG sımlın yawme d’şabtho dşaficina cuqobo folhoyo mqabıl du gayso kaboşo dı Turkiya bi fnitho d’Beyazıd dıknıflo bi hiğmonutho d’Ağri bu madınho du qlimo d’Anatolya b’Turkiya. Bi netije da taxtuşe qaşye dhawın b’ruhqo qariwo bayn da tıre gabe, ahaylawotho dı Turkiya jbiri dmahızmi mi fnitho, elo u gayso Turkoyo bıthır mu cuqobano dsim hjımle b’zayne yaqure cali fnitho, u hawın celtho dhowe yuqdone dkımdawmi hul ucdo.

Bebzabno, u buyono mawdacle da haylawotho di HPG sımlın yawme dı cruto dşaficina cuqobo bi qastra d’Çıle bi hiğmonutho d’Hakkari bu tayman madınho dı Turkiya. Ubi netije du cuqobano shifi tarte nuqazyotho u qtili a’folhe Turkoye dkıtwın ebaye.

Camgabıdathe, i mharbonitho di HPG Hiyam Qasem qtilo bu hçomo oyaroyo dsımle u gayso kaboşo dı Turkiya bi fnitho d’Zab bu siqumo d’18 bu yarhano.