17/02/2021

Ahçome dsimi cal Erbil mqabıl di socurutho du pap u da guboye dıgmisomine

Emwotho Mhaydotho u Amerika mawdaclın dıklozım aguboye dmisomi dlo zuctho bu Iraq.

 Camgabıdathe, hın ma rişone du Iraq mawdaclın du hçomo dsim cal Arbil egartho mqabıl di socurutho du papa u da guboyeyo, u bebzabno mawdaclın dıklozım b’zuhoro dmiqadım li sbutho d’Şigur.

 İ mathlonitho d’Emwotho Mhaydotho bu Iraq Jenin Plasxart, bu mamlo dsımla athmıl bu mawtbo di mşaynutho d’Emwotho Mhaydotho, mawdacla du hçomo dsim cal Arbil kıtle u nişo dmaqşe i mwatyutho, u gruşla ste u zuhoro cala gabe folitiqoye du Iraq dkımakdi i ulsoyutho dmisım guboye msarhıbe.

Plasxart sımla ste qroyto li şultonutho du Iraq ula gabe kulle, d’obın fsoso la mraşhe Iraqoye kulle dfılhi b’hirutho, dlo furşono du ğenso, di tawditho, du mathhab, udu leşono, bnişo dmisım guboye şafye dkito ebaye tuxlono.

Camgabıdathe, Plasxart grışla u zuhoro cali socurutho dsımwola li fnitho d’Şigur bu yarho d’Konun u Haroyo dşaficina, u mırla “bi socuruthathe qayıthli aftho dlıqyono amşale wa mathlone d’Şigur. Kito ha mede qriho: kito b’qamuthayna fulhono ğalabe wa mahırwone d’lawğıl ud’larwal ğalabene u kımdawmi dmahırwi u maşıqlo”.

Megabo hreno, Amerika mawdacla laşan dmitayıb arcutho tawto la guboye du Iraq di şatathe, klozım dmınfıq mqabıl da grube mzayne dıkmısnodi mu İran, dmıkle b’fothıd da fulhone İranoye dkımharhızi i şalyutho bu Iraq, udmınfıq mqabıl du mede dfayış ma grube marıhbone dı Dacış.

U mathlono d’Amerika b’Emwotho Mhaydotho Richard Meyls, bu mamlo dsımle athmıl bu knuşyo dımtayıb calu Iraq, mırle “agrube mzayne, a’tuhmonoye wa mahırwone kımmathli i tırpılto rişoyto dmaho mqabıl dmisım guboye mşayne u şarire bu Iraq. A grube mzayne dıkmısnodi mu İran kmadhcıfi u tuxlono du camo bi şultonutho uba guboye dgıdmisomi bu yarho dı Tışrın u Qadmoyo dıbqamuthayna. A grubani kıqıtli abnaymothoye du Iraq u kmınci u athro ma mcadrınwotho momunoye uma tarmiyotho nuxroye dkıtyo sniqoyo elaye”.

Mxasra hreto, u rişwazire du Iraq Mustafa Alkadhimi bu buyono dıfrısle athmıl, mawdacle da hçome dsimi cal Arbil kıtlın u nişo dxulti a’warqe bıhdode, udxulqi bulbolo b’gawıd du athro. Alkadhimi mırleste “u hçomano u marıhbono athi luhwoyo bu zabno dıkmisım fulhone rabe mi şultonutho d’Boğdod, bnişo dşılyo i aykanoyutho di fnitho, udmitarhıq u Iraq ma qrobe uma krize dkito bu qlimo”. Camgabıdathe, Alkadhimi mawdacle da haylawothayde msıklın u grub du mawtbo awkith a’ganohe dıqtiwolın menyono ma hfite u gelyunore Iraqoye bi mditho d’Albasra, u makadle ste di şultonuthayde lıgıdtıcyo u admo da bnaymothoyayda, u bfusqono kamiloyo dımdawmo bu msoko da qatole u marıhbone.

Baynothaye ste, u rişono du gabo dı Tayyar Alsadır Muqtada Alsadır, makadle dlıkmaqbıl da n’athrawotho şbobe dhowelın mudaxala ba sebwotho gawoye du Ciraq, u mawdacle ste dıklozım i şultonutho b’zuhoro dımqadmo li sbutho d’Şigur u mırle “lıkbacno dhowe mudaxala baroyto ba sebwotho du Ciraq, ulıkmaqbalnoste du Ciraq dhowe nuqazto la hçome cala n’athrawotho şbobe. Marke kımzaharno mu mede dkibe dhowe b’Şigur ubi sbutho da thume cam Turkiya. Klozım i şultonutho dımqadmo b’zuhoro ub’hexamtho. Balki i mwatyutho dkito b’Şigur, a’hçome dsimi cal Arbil wu tuwoqo dhın botaysawbo bu taymno du Ciraq, kımmathli dawsat qadmoye dkıtlın u nişo dmaqimi mi holo i socurutho du papa awste dmitaqimi a’guboye msarhıbe”.