A’kardinale di cito Qatholiqoyto layimi adyawma bi mditho d’Roma, laşan dımnaqın papa hatho. Baynothaye fateryarxo Mor Louis Sako

A’kardinale di cito Qatholiqoyto kfixi adyawma cali mditho d’Roma ma n’athrawotho mşahıfi dıbritho, laşan dıdırşi dminaqe papa hatho lu Vatikan. U knuşyano da kardinale kmıhşu da hamşo mu zabno du şunoyo du papa Mor Fransis yawme dı Tre dşaficina b’cımro d’88 ışne. 

Bebzabno, u knuşyano kmıhşu xıd knuşyo da hıdriyat meqım mi sunados sxirto dgıdlaymo bi cito d’Sestin bu Vatikan. Meqım mathe, a’kardinale laymiwo lıhdode meqım mu zawho du cufoyo du papa Mor Fransis dımtayabwo yawme d’Şabtho dşaficina. 

Kmıntır ste di sunados sxirto dlaymo bu siqumo d’hamşo bu yarho d’İyor dıbqamuthayna, wu kardinal dgıdqomır ba guboyani klozım dqathle tre ma tlotho sahme da qole. Ubu zabno dgıdminaqe u papa hatho, gıdmidıc u medano bu darbo du dexono heworo dgıdnofıq mi cito d’Sestin du Vatikan. 

Gawonoyith kito ucdo 252 kardinale, baynothaye kito balhude 135 dkıtne laltah du cımro da 80 ışne, udkıtlın u zedqo d’obın qolaye ba guboye. 80% ma 135 kardinale masırhi bu syomido du papa dınqil ma hayani Mor Fransis, ubaynothaye ste kito menyono celoyo d’clayme dgıdlaymi inaqla qamayto l’knuşyo dcamıhdode. 

U knuşyo sxiro di sunados gıdmitayıb bi cito d’Sestin bu Vatikan lfuth protokol qaşyo. Ugıdmisım ebe arbıco quwole kul yawmo, tre ba şoce dsafrayto u tre hrene ba şoce dbıthır d’falgıdyawmo hul dqathle ha ma kardinale mraşhe tre ma tlotho sahme da qole.